Giovedì, 14 Maggio 2026 - 18:04 Comunicato 1322

Bail de fest van Haile Floriano, der vicepresident va de Provinz Achille Spinelli ont der assessor Mattia Gottardi

Vlarotz, inngabichen der nai plòtz ver en helikopter

Traduzione in mòcheno

[Mòcheno] An to za vaiern bou as de gamoa’schòft va Vlarotz hòt ompòrt gem pet ear ont en vil. De innbaich van nai plòtz ver en helikopter ist mear abia an oa’vòchege schnitt va de schnuar, ober s ist an bichtegen moment ver en lem va de gamoa’schòft ont van lònt gaben. Drinn en rom van fest van Hailege Floriano, de lait, de Pompiarn va Vlarotz, de autoritetn ont bolten dersteller van Zivilischutz, van vraischòftn ont va de vraiòrbet hom toalganommen en de naikaitn van gònze to. S sai’ gaben der vicepresident on assessor en de birtschòft, òrbet, familia, universitet ont untersuach Achille Spinelli - as de grias va de Provinz ont van president Fugatti trong hòt - ont der assessor en de urbanistik, energi, verkear, sport ont schitzplatz Mattia Gottardi aa.
“Hait - hòt tsòk der vicepresident Spinelli - sai’ do za vaiern pet enk òndra billt song unterstraichen zòmm de bèrtn va de doi gamoa’schòft, denken de burtzn van a kultur va de solidaritet ont va de sicherkait van lònt ont ver de lait as do lem. De òrbet as ber innbaichen klòfft prope van an òcht en tema va de sicherkait ver a gamoa’schòft as gèltsgott en doi plòtz guat bart sai’ za gea’ en de tsunthaitstrukturn pet glaicha zaitn abia de lait as en de stòttn lem. De rua ist s bèrt as de lait hom barn en doi tol: de rua za meing do lem ont zaglaich za hom an gahassegen nètz ver za gea’ en de dinstn va hoa qualitet as ber en inser tsunthaitsistem hom gèltsgott en de hauptlait van Hilfdinst ont van Zivilschutz, en de beiln as e do gèltsgott song bill.
De doi sicherkait ont de doi effizienz gem de moglechkait en de gamoa’schòft za gea’ envir za paun do dei sai’ zukunft.”
“De doi innbaich zoacht an “earst” ont an “derno” ver de gamoa’schòft va Vlarotz - hòt tsòk der assessor Gottardi - ver en bichtege bècksl as e derstellt ver bem as òrbetn tuat ver de sicherkait van lait.

Fierozzo, festa di San Floriano [ Archivio Ufficio Stampa PAT]

“I bill padonken, zbischn de òndern, de Vraibellega Pompiarn as sai’ toal va de doi gamoa’schòft za vòngen u’ van alievi, hòt er nou tsòk Gottardi -. I tuas bavai i aa pin an Pompiar ont i boas bos as song bill schaung van aigene lait ont tschbinnen va de sai’ sicherkait. I bill me padonken pet de gamoa’schòft va Vlarotz, as do en bolten ist za vaiern der doi to. A gamoa’schòft as hòt tschèrlt za plaim za lem as de hoachen lander asou za versichern s bècksln van generazionen van pompiarn. De doi gamoa’schòft ist oa’n van hèrzn va de identitat van Trentin gamòcht va lait as pet ear schaung za verpessern s sai’ lònt.”

Der nai plòtz ver en helikopter, paut pet en zuazol va de Autonome Provinz va Trea’t, van Consorzio BIM van Agige, va de Tolgamoa’schòft Hoa Valzegu’ ont Bersntol ont va de Gamoa’ va Vlarotz, vinnt se nem en de caserma van Vraibellega Pompiarn. En corpo s hòt 30 pompiarn, 8 alievi ont 5 eltera pompiarn; en kurza zait 3 alievi barn kemmen pompiarn. Men geat iberhaup as vaiern en bòlt, unvòlln ont za hèlven en helikopter. No de mess, kein en a kirch vòll va lait, ist kemmen der helikopter asn nai plòtz ont ver de targa as denkt der Pio ont der Paolo Pintarelli ver sèll as de hom gatu’ ver de gamoa’schòft. No as ist kemmen inngabichen der plòtz van helikopter ist men zòmm plim za èssn. No en vormes ist kemmen gamòcht a gara nèt kompetitiv van korpe van Distrett.

En sunta as de 3 van moi en Vlarotz sai’ gaben, zbischn de òndern, der Pirgermoaster Lorenzo Moltrer, de Pirgermoastern van Bersntol, der komandant van Vraibellegen pompiarn va Vlarotz Ezio Corn, der ispettor van Union van distrett va Persn Mauro Oberosler, der vicepresident va de Federazion van Vraibellega Pompiarn van Trentin Daniele Postal, der president van Tolgamoa’schòft Hoa Valzegu’ ont Berntol Andrea Fontanari, der president van provinzal rot Claudio Soini, de consiliar Stefania Segnana ont Vanessa Masè, de senatrice Elena Testor, de vourstea’ner ver en Soccorso Alpino, van Nucleo van Helikopter ont de Alpine.

Do service ont vrong