Martedì, 08 Giugno 2021 - 18:15 Comunicato 1488

Traduzione in ladino
Vegn endrezà endò l Festival de la Joentù de l’Euregio

Enscinuazions enscin ai 14 de jugn. Fugatti: na ocajion per i joegn trentins de cognoscer miec i trei raions

Dai 22 ai 25 de setember del 2021 vegnarà endrezà la diéjema edizion del Festival de la Joentù de l’Euregio a Steinach am Brenner a Dìsbruch. Chest an l Festival l’à desche mot “Frabichèr l’Euregio dessema”. En dut 35 studenc, anter i 16 e i 19 egn, i podarà se confrontèr con enteressanc aprofondimenc en cont de la carateristiches di trei raions che fèsc pèrt de l’Euregio Tirol, Sudtirol e Trentin. La zerimonia, che vegnarà endrezèda ai 24 de setember del 2021 a Dìspruch, raprejenta de segur l moment più emportant de la diéjema edizion.

Tel Festival de la Joentù de l’Euregio vegn pervedù n program de evenc n muie rich: apede a la discuscion de argomenc che engaissa e de enteress per l davegnir de la mobilità, educazion e svilup de l’Euregio, l’é stat pissà a sacotemc esperc, a na vijita al Pianet di Tunìe Bbt de Steinach am Brenner e al nef Ofize de Informazion e Coordenament de l’Euregio a Dìsbruch. Na pèrt zentrèla del Festival de la Joentù l’é de segur la neva amicizies che vegn fora anter chi che tol pèrt e che vegn cà da la trei regions de l’Euregio.

“Ence chest an l Festival de la Joentù de l’Euregio ge sporc ai joegn na oportunità enteressanta per viver dis bie e de cognoscenza con persones con idees soemantes, che vegn dai trei raions – sotrissea l Capitan del Tirol Günther Platter – En ocajion de chest event i podarà se fèr na idea del potenzièl e de la oportunitèdes che ge vegn sport da l’Euregio. Chest l’é emprotant no demò per l davegnir di joegn, ma ence per l davegnir de la cooperazion anter la trei regions”.

“Ence per i joegn trentins se trata de na possibilità de aer n barat percacent de idees con conscric che rua dai etres doi raions e de entener coluna possibilitèdes pel sporjer l’Euregio” sotrissea l president de la Provinzia autonoma de Trent, Maurizio Fugatti.

“L Festival de la Joentù de l’Euregio Tirol, Sudtirol e Trentin raprejenta n moment emportant de discuscion e de confront. Delaìte de chesta manifestazion i joegn che tol pèrt i podarà confrontèr sia esperienzes, pissèr e dèr na gaissa neva e concreta al davegnir de l’Euregio” met al luster l president de la Provinzia autonoma de Busan, Arno Kompatscher

Se pel se enscinuèr enscin ai 14 de jugn tel link: www.euregio.info/festival2021. Se pel tor pèrt debant.

Del 2014 l’Union Europeèna ge à recognosciù al Festival de la Joentù de l’Euregio l secont post tel prum pest del GECT "Building Europe Across Borders". Chest an, l projet per i joegn de l’Euregio Tirol Sudtirol Trentin fèsc festa per sie disc egn. L’obietif l’é chel de dèr neva gaissa a la cooperazion sorafora la seides e ge dèr l met ai joegn de l’Euregio de se scontrèr e donca engaissèr l barat de idees.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)

(cdt)


Immagini