Endèna la scontrèda, a chela che à tout pèrt no demò Fugatti ma ence l sorastant generèl del Dipartiment infrastrutures Luciano Martorano e del sorastant de Apop Mario Monaco, l é stat portà dant la desvaliva soluzions pissèdes timpruma per chesta opera, ruan tinultima a meter dant l’ipotesa che perveit la galaria unica e duc si vantajes.
La varianta troèda fora la scomenza da n nef rondel logà a sud de Ciampedel, aló dal hotel Flora Alpina. La passa la Veisc de gra a n pont nef e la va ite tel crep, vegnan fora beleche trei chilometres più a est a nord de Cianacei, apontin sul rondel che l é jà envers Dèlba. L projet tol en conscidrazion i picoi mudamenc metui ju dessema coi teritories per miorèr l sistem per traversèr la Veisc. La neva viabilità la é longia zirca 3,2 chilometres, de chi che zirca 2,8 i é de galaria naturèla.
“Pisson che chest projet sibie na soluzion positiva, che ge va do a l’ipotesa con chela che la aministrazions locales e la popolazion é states a una jà dal scomenz. Se spera donca che se posse peèr via col percors realisatif”: chest l messaje del Procurador Detomas a una coi ombolc Ivo Bernard e Giovanni Bernard.
Gran sodesfazion ence da man del conseier ladin Luca Guglielmi, “per l contegnù de la scontrèda anter i aministradores locai e l president de la Provinzia che desmostra la dedizion con chela che se se à dat ju per la varianta de Ciampedel e Cianacei, un’opera emportanta e spetèda èrs da più che 30 egn”.
L apuntament l é stat ence na ocajion per vardèr fora la operes pervedudes per la mobilità te Fascia, e avisa per l pont “de Lejia” a Sèn Jan e per fenir su l percors per jir a pe e co la roda te duta Fascia.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
