Derzua en an fissetn toal, der paitrog tschbinnt vour za gem mear gèlt benn de baiber gea’ bider oder plaim af de òrbet. “No en dritte jor va lem van dritte kinn - sok derzua Spinelli - tschbinnt men vour an paitrog va mear ver de baiber as gea’ bider za òrbetn oder as de u’vòngen an sai’negen bèrk. Asou billt men unterstitzn s augea’ van kinder, de òrbet van baiber ont de attraktivitetn van lònt.”
S moss
S moss ist ver de familie as en de provinz va Trea’t lem bou as, sait en 1 van genner 2026, augeat ont kimmp adoptiart a dritteges kinn. Men mu kriang der paitrog ver nèt mear abia zeichen jor va benn as s dritte kinn augeat oder va bem as adoptiart kemmen ist. S hòt an fissetn toal as ònderst ist no en de patrimonial-birtschòftlege kondizion va de familia, as u’tsòk kimmp no en ICEF familia.
S kemmen drai gruppn toalt:
- ver de familie pet ICEF finz 0,40, kriak men nèt mear abia 48.000 euro, auszolt pet 400 euro òll mu’net finz as s kinn zeichen jor hòt;
- ver de familie pet ICEF iber 0,40 ont finz 0,70, kriak men nèt mear abia 30.000 euro, auszolt pet 250 euro òll mu’net;
- ver de familie pet ICEF iber 0,70 oder a’ne ICEF, kriak men aa 30.000 euro, auszolt pet 250 euro òll mu’net.
De vrog van fissetn toal van augea’paitrog miast pfrok kemmen va de mama, as hòt de elterlech autoritet, unter de zait va 90 to va benn as s kinn augòngen ist oder adoptiart kemmen ist, zbischn anpatronat va de Provinz. De kondizionen ont requisitn za kriang s moss kemmen u’tsòk af de vrog ont de miasn sai’ benn as s kinn augòngen ist.
Derzua en fissetn toal kriak men 200 euro òll mu’net va mear, ver de mame as, no en dritte jor va lem van dritte kinn, gea’ bider oder plaim af de òrbet, aa benn de an aigenen bèrk u’vòngen. Der prais va mear kimmp òll jor gem en de mama as en vrok, finz en zeichente jor va lem van dritte kinn, as en moment va de vrog u’sok za hom gaòrbetet ver en gònzn 180 ta en jor vouraus. De earste vrog ver za kriang de doi prais ver en augea’paitrog kimmp pfrok pet de hilf van patronatn as en de provinz sai’.
Bichtestn virm ont kritern
Der paitrog kimmp gem en de familie as en de Provinz va Trea’t lem ont en de beiln as sait en 1 genner 2026 a dritteges kinn augeat oder adoptiart kimmp. De bichtestn kritern ver za kriang s moss, sai’ de residenz en de provinz, s mitgliad en de glaiche familia va de mama ont van kinder, ont as de mama an òrbet gahòp hòt, as miast òrbetn bail en augea’ oder adozion van kinn, oder zuazolt hom de previdenzialpaitroger ver mindestn zbelf jor en de leistn vinf jor.
D S regiar ont s auszoln van paitrog kemmen gem en Provinzalbèrk ver de assistenz ont de integrativprevidenz.
Klòfft der vicepresident Spinelli
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
