Do de oa’zelnhaitn va de iniziatif.
Abia schoa’ derklort, men mu kaven de tauerkòrt en de zeitlerboteing va Trentino Trasporti ont Trenitalia Spa van pfinsta as de 28 van moi 2026 ont s bart kemmen gem en de sèlln as hom de aigenekòrt “òrbeter ont òndra” ont de aigenekòrt “pensionatn” (kategori A, B ont D).
Der roastitl bart gem s rècht za meing prauchen de doin dinstn:
- Bus ont stòttbus ont ausstòttbus va Trentino trasporti SpA
- Ferrovia Trento-Malè-Marilleva
- Ferrovia della Valsugana zbischn Trea’t ont Primolano
- Ferrovia del Brennero (lai nèt de dinstn IC, EC, Frecce) zbischn Borghetto ont Mezzocorona/Ora (de stazion va Ora mu men sa prauchen lai ver de roasn va oder keing de Val di Fiemme ont de Val di Fassa; s plaim aus de stilln ver anau/ano va Salorno, Magrè/Cortaccia ont Egna)
- Funivia Trento-Sardagna
Ber as nou nèt hòt de smart card mu sa vrong ont ausvilln de vrog (as men konn vinnen online aa), òlbe durch de tirler va Trentino trasporti ont Trenitalia; de kòrt bart kemmen paroatet en a por to ont de kostet viar euro (derzua en de zboa’sk euro van draimu’nettauerkòrt).
De Junta hòt nou tschrim de moglechkaitn za kriang zaruck s toal. Ber as schoa’ hòt gamòcht de tauerkòrt gilte ver secks mu’netn oder ver a jor as luckt de summerzait, bart kriang zaruck s toal as bart kemmen garèchtn benns en de doi zait hòts zaitn lenger abia draisk ta. S kimmp nèt zaruck gem s toal ver de tauerkòrtn van a boch oder van a mu’net sai’se ver de stòtt oder aus va de stòtt aa.
Zaitn ont virm ver de vrog ver za meing kriang s toal barn kemmen gamòcht kennen vour de zeichena van prochet as de istituzional saitn va de Provinz ont va Trentino Trasporti.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
