Ver en 2025 mu’ men vourstelln de vrong en zboa momentn: van 19 van moi finz as de 30 van prochet ont van 8 van leistagst finz as de 23 van schnmikeal.
De vrong miasn sai’ vourstellt lai online turch en Laitzimmer, men mu’ vinnen - zòmm pet de dokumentn va de naiòrbet - en adrèss https://www.provincia.tn.it/Servizi/Contributo-per-immobili-privati-rivitalizzazione-aree-rischio-abbandono.
De naiòrbet hòt semm en gònzn 10 milionen va euro (5 milionen ver en 2025 ont 5 milionen ver en 2026).
Ver za hèlven de lait za innschraim de vrong ont ver za gem òlla de nochrichtn ver za mòchen toal van bando, ist kemmen anaugaleik a telefonische nochrichttirl bou as men kònnt riaven kuriart van Omt ver de politik va unterstitz ont dinger za tea’ ver za mòchen desterer de Urbanistik, as ist en Via Malta 67 ka Trea’t. Der dinst ist òffet van ma’ta asn vrai’ta va um 9.00 finz um 12.00 en numer 0461 492712.
S ist gor kemmen augatu’ de elektronischepost ver dòs recuperocentristorici@provincia.tn.it.
Ber kònnt vourstelln de vrong
De doi mos ist lai ver de lait (nèt ver de bèrkn) as iatz oder iberinn sècks mu’netn hom asn sai’ nu’m s haus oder as de hom a boreta rècht as de haiser as sai’ en de gamoa’n enteresiart. òll mentsch as vrok kònnt kriang an paitrog ver nèt mear as drai’ haiser. Men muast mòchen almen an òrbet va verpèsser asn haus as bart kemmen s earst haus, bou za plaim oder za gem en zins pet minder gèlt.
S haus miast sai’ galep oder gem en zins ver 10 jor.
Der paitrog kònnt drinn hom gor gèlt ver za kaven s haus, ober s muast nèt sai’ sbischn vrai’t oder glaima lait va earste grad, ober men gip nèt an paitrog lai ver za kaven. Ber as hòt mear as 45 jor ont billt prauchen s haus abia earst haus muast nèt sai’ inntschrimm, as de 6 van agst 2024, en de gamoa’ bou as s ist s haus.
Paitrog as men mu’ kriang
- Ausmòchen: finz en 40% van kòst drinn en òlt dorf ont finz en 35% en de òndern eirter, men mu’ nèt kriang mear as 80.000 euro (as an kost va 200.000 euro, men mu’ nèt spendiarn minder as 10.000 euro).
- Kaven: 20% va bos as bèrt ist s haus za richtn aus, finz nèt mear as 100.000 euro van kòstn u’ganommen.
Kòstn u’ganommen
- Innbende (max 125.000 euro): peirn, mauern, innbendega tirn ont balketer, hidraulische innrichtn, termische (aus de fotovoltaici), elektresche, innbendega stiang as nèt sai’ zòmm pet òndra.
- Ausbende (òrbetn asn gònze haus oder as de bent as men sicht): dòch, mauern, zaig as bèrt hòt, stiang, seldern, peirng, zai’.
- Technische kostn: de kemmen u’ganommen finz asn 10% van kost ver òll kategori (innbende/ausbende).
Paschraimung
Ber as vrok miast sai’ pauer oder hom s rècht ver za vrong en moment va de vrog oder en de seks mu’netn.
S haus mu nèt sai’ en de kategori katastaln A1, A8 oder A9, s mu nèt hom mear bos ocht wohnen ont nèt en an condomio.
An iatn paitrog bart kemmen gem an numer CUP, za miasn prauchen as de rechnung ver de kostn va de òrbetn, as dòra miasn kemmen trong. De rechnung miast kemmen u’trong vour de 24 mu’netn va benn as kimmp gem der paitrog.
Men mu’ nèt zòmm der paitrog pet òndra òllgamoa’ zuazoln, nanket de sèlln as de staiern, as kearn en de glaiche òrbet en de leistn zeichen jor.
Virm ver za vourstelln de vrong
De vrong meing kemmen vourstellt van ma’ta as de 19 van moi envire as de saitn online as sai’ en adress https://www.provincia.tn.it/Servizi/Contributo-per-immobili-privati-rivitalizzazione-aree-rischio-abbandono bou s sai’ tschrim òlla de datn van doi paitrog. En vòll va mear vrong ver en glaiche haus, s ist ganua as lai oa’n vourstellt de vrog ver de òndern aa (pet en sai SPID oder CIE).
Dokumentazion as men praucht
Ber as vrok miast hom en moment va de vrog de doi dokumentazion za leing derzua:
- pericht van techniker as mu unterschraim, pet tschrim de òrbetn za mòchen no en sèll as paschraip der paitrog;
- dokumentn va sèll as men bart spendiarn;
- en vòll va mearer as vrong zòmm men praucht de delega ont longkòrt ver de òndern;
- longkòrt ver za mein òrbetn va òndra pauern oder ber as rècht hòt.
Liste
De vrong barn kemmen araustschauk no de kritern as sai’ en rot, men mu sa vinnen zbischn de dokumentn as de sait https://www.provincia.tn.it/Servizi/Contributo-per-immobili-privati-rivitalizzazione-aree-rischio-abbandono.
De gamoa’n enteressiart
Der paitrog ist gilte ver de gamoa’n va: Altavalle, Bleggio Superiore, Bondone, Borgo Chiese, Bresimo, Canal San Bovo, Castel Condino, Castello Tesino, Cis, Cinte Tesino, Dambel, Garait, Grigno, Livo, Luserna, Mezzano, Novella, Ospedaletto, Peio, Pieve di Bono-Prezzo, Pieve Tesino, Rabbi, Rumo, Sagron Mis, Segonzano, Sover, Terragnolo, Tre Ville (aus en dorf va Palù di Madonna di Campiglio, Kataster Gamoa’ “Ragoli II”), Valdaone, Valfloriana, Vallarsa, Vermiglio.
En doi link ist moglech oarnemmen de letratn ont de vrong
De vrog en president Maurizio Fugatti
De letratn
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
