L titol de la performance, UTERE, l é l resultat de n jech linguistich segnificatif anter ladin e talian: utère o mère (dal latin uterum). Sacher e profan te n event che Claus Soraperra declarea de voler portèr dant desche “L’ocupazion de na lèrga publica e sia trasformazion te n lech sacrèl per denunzièr l deteriorament, slarià fora e periferich, di valores fondanc de la umanità col tor su valores tipics del consumism e de la globalisazion”. “Voi portèr dant - seghita l artist - l tem del corp e de la invenzion de la icona desche visibol del invisibol, del fisich e de sia manipolazion che l doventa scomenz de la neazion de la materia a favor de la evocazion del trascendent tras l sacher”. L Museo Ladin vegn individuà da Claus desche lech de la identità, de la realtà del teritorie che l’à compagnà idealmenter tel svilup de sie percors artistich. Per Sabrina Rasom, diretora del Istitut Cultural Ladin e del Museo Ladin de Fascia: “A la istituzion ge pervegn de tor dant e ninèr la creatività e de ge dèr l met ai artisć ladins de se palesèr e de palesèr sia èrt. Ajache l’èrt l é la ousc de na comunanza che no sà più da rejonèr, pech ascorta, che descheche l é normal fosc nience no la se fèsc domanes, ciapèda via descheche la é a arjonjer etres obietives o che la peissa che sia identità, chela ladina te chest cajo, la sibie aboncont”.
Desche coronament de la performance sarà prejentà l catalogh de UTERE per compagnèr l spatador tel aprofondiment del argoment, co na contestualisazion de l’èrt moderna de Soraperra tel gremen artistich-filosofich internazionèl, portèda dant da n scrit del gran critich de èrt Ernesto L. Francalanci, cognoscidor ascort del percors artistich de Soraperra; e con na contestualisazion del event e de sia operes te la realtà ladina fascèna da man de la diretora Rasom.
Na ocajion donca, chela de UTERE, per i ladins e per i amanc de l’èrt de jir te Museo Ladin per se lascèr tor ite da la cultura e da la identità de n popul de mendranza etnich-linguistica che, très Claus Soraperra de la Zoch les se confrontea coi temes atuèi e universèi de la alienazion sozio-economica e del conformism.
Claus Soraperra vif sia dimenscion te l’èrt desche referiment biologich e fadia umèna. Da scialdi l se dèsc ju tel sparpagnament de la cultura e de l’èrt desche strumenc che serf e joa a la soravivenza de la jenia umèna.
