Pinn Presidént Mattarella vor in gedenkhtage vodar Republìk un vodar spetzialege Autonomì
Tage vodar Autonomì: atz 5 von herbestmånat da istituttzionàl zerimònie vor di 80 djar
Traduzione in cimbro
[Cimbro] Da istitutzionàl zerimònie vor in Gedenkhtage vodar Autonomì bodase bart haltn an såntzta atz 5 von herbestmånat di vünve un a halbez in tages in Tetaro Sociale ka Tria, bart håm azpe tèma: “1946-2026: di 80 djar vonar Republìk un vonar spetzialegen Autonomì”. Dar trèff bart soin okasiong zo vaira pinn Huapmånn von Stato Sergio Mattarella, di achtzekh djar vodar belesan Republìk un von akòrd De Gasperi-Gruber, boda hatt gegruntet in spetzifege ordinamént von Trentino-Südtiról. An istitutzionàl momént zo kheara abezomacha achtzekh djar stòrdja un zo übarlega aftn vèrt boda hatt da spetzialege Autonomì un aftn ruòl bose khint gerüaft zo haba, haüt un in di djar boda khemmen, vorünsarne lentar.
Dar zerimònie bartnda nemmen toal dar vorsitzar vodar autonome Provìntz vo Tria Maurizio Fugatti, dar vorsitzar von provintziàl Rat Claudio Soini, dar vorsitzar von Rat vor di lånt autonomìan Michele Cereghini.
Darzur bartnda o nemmen ’z bort dar Umberto Gentiloni, profesór ordinario vo Stòrdja vodar Universitét La Sapienza vo Ruam boda bart ren übar: “Di kraft vodar belesan demokratziì: di achtzekh djar vonar Republìk” un dar Giuseppe Tognon, vorsitzar vodar trentinar Stiftung Alcide Degasperi, er bart ren übar “Alcide Degasperi un di Autonomì. Di stòrdja vonan internationàlegen akòrd”.
In trèff durchgevüart vodar djornalìsten Maria Concetta Mattei, barta singen dar kòro vodar SAT.
Bia zuarzogiana un bia zo meldase al press vor djornalistn, fotografe un video-machar bart khemmen khött in di tang boda khemmen.
Dar trèff bart khemmen auzgelatt garade in televisiong un in streaming.
Übarsetzt von Schaltarle vor di zung von Toalkamou vodar Zimbar Hoachebene
(cdt)
Immagini
