Venerdì, 17 Gennaio 2025 - 16:19 Comunicato 82

Traduzione in mòcheno
Summerkursn full immersion as englesch ont as taisch, offet de zaitn ver za schraim se inn

De doi iniziativ kimmp gamòcht ver de studentn as inntschrim sai’ bail en doi schualjor en earste finz en viarte jor van zboate provinzal oder paritet u’learschual 

[Mòcheno] S hòt zait finz um viara nomitto van eirta as de 11 van hourneng 2025 ver za stelln vour de vrog ver za nemmen toal en programm meivernse en auslònt organisiart va de provinzal amministrazion, ver za meing mòchen kursn full immersion as englesch ont as taitsch as tauern drai bochen bail en summer 2025. De studentn as toalnemmen barn miasn af de 31 van merz 2025 zbischn de 14 ont de 20 jor hom.
Der programm meivernse, gònz organisiart va de Amministrazion, hòt abia rif der sèll za verlaichtern ont unterstitzn s verpessern va sprochkompetenzn van studentn ont za heiven de zeiln van sprochzertifikatn en englesch ont taitsch. S meivernse bart gamòcht kemmen en de Lender va de Europeische Union oder en Englont.
Studenti [ foto Cavulli/Università di Trento]

De naiekait, as ungefèr 600 studentn u’graiven bart, ist gamòcht en raich van Program FSE + 2021-2027 va de Autonome Provinz va Trea’t. Der program ist zuazolt va de Europeische Union - Europeische Zòmmlemmittln plus (ver en 40%), van Stòtt (ver en 42%) ont va de Autonome Provinz va Trea’t (ver en 18%).

Ver za nemmen toal, der student miast de vrog mòchen turch an informatikvurm paroatn va de Amministrazion; de vrogn meing tschickt kemmen lai en digitalvurm, turch en portal pet de Innmèldndatn va SPID.

De Amministrazion bart de ranglistn mòchen van vrogn as u’ganommen kemmen en “Programm meivernse en auslònt studentn 2025” toalt ver vremmsproch ont ver elt van toalnemmer (Junior oder Junga Groasa).

De organisasion van meivernse kimmp gamòcht va de Amministrazion as, ver en rif, de dinstn va de Stuktur Ad Personam prauchen bart . De Amministrazion bart zoln de doin sòchen: roas za gea’ ont kemmen ver ont van auslòntsitz; learprogramm (òrbet za schual ont outdoor - pasuachen, schualòrbetn); unterkunft en vollpension kan a familia oder en college ver de zait van meivernse; zòmmgea’ ver de roas za gea’ ont kemmen va Balschlont en auslònt; tutordinst avn plòtz, abia referentpunkt ver de studentn; versicherung ver de riskn, s beatea’se ont s zivilvourstea’ ver de gònze zait van meivernse; moglechkait za hòlten der test van sprochzertifikat.

En toalnemmer ist pfrok za zoln an toal va zòmmzuazoln as geat um de 400,00 ont de 1.400,00 euro, (s bèckslt no en ICEF 2024 as arauskimmp va de Oa’zege Vrog 2025 af innkemmen ont pahalter 2023, ver de praisunterstitzn ver en studiumrècht ont earstekinderhait ver en schualjor 2024/25, prais as gilte sai’ va de 1/1/2025) ont an kauzionzuazoln va 400,00 euro, as zaruckgem bart benn as men zaruckkeart ont benn men nogòngen ist en de vrogn va de Nochricht. De studentn barn hòlten miasn: an inngea’test, an riftest ver za kontrolliarn de idoneitet van student za hòlten s sprochzertifikat ont, benn men guat ist, s sprochzertifikat.

En gònzn sai’ galeik kemmen ver de òrbetn va de doi Nochricht 1.800.000,00 euro (720.000,00 kemmen galeik va de EU - FSE +, as ist der 40% van gònze kost).

Ver nochrichtn men mu’ klòffen pet:

Lòntmeareròrbetnstruktur Ad Personam

Via Pranzelores, 69 – 38121 Trento

Van ma’ta en vraita va um 8.30 finz um 17.30

Grea’nummer: 800 163 870 – fax 0461 390707

e-mail: mobilita.fse@provincia.tn.it

sito web: https://www.provincia.tn.it/Servizi/Percorsi-full-immersion-in-inglese-e-tedesco-in-Europa-estate-2025

Ibersetz gamòcht van Sprochtirl va de Tolgamoa'schòft Hoa Valzegu' ont Bersntol

(cdt)


Immagini