
Disa initaziatìf bart innvången schiar 600 studjént, un khint gemacht drinn in européan sotziàl Progråmm Font 2021-2027 vodar autonome Provìntz vo Tria. Dar Progråmm iz geschützt vodar Européan Uniong – européan Sotzial font plus (vor in 40%) von Stato (vor in 42%) un vodar autonome Provìntz vo Tria (vor in 18%).
Zo nemma toal dar studjånt mocht inngem in vorsch nå dar informatege protzedùr augelekk vodar provintziàl Vüarom; di vorsch mang khemmen geschikht lai in didjitàl, gianante aftz soin portàl nützante in SPID.
Di Vüarom bart nidarleng in roatordnung von vorsch boda soin khent ågenump vor in “Progråmm vor di studjént zo giana in auzlånt 2025” inngetoalt nå dar fremmege zung boda iz khent zornìrt un nå in djar von toalnemmar (Junior odar Eltare Djunge).
Da gåntz organizatziong iz augehaltet vodar provintziàl Vüarom boda, vor ditza, machtar helvan vodar struktùr Ad Personam. Di Vüarom bart asó zaln dise sachandarn: viazo zo giana un zo kheara bidrùmm vor ’z auzlånt; in progråmm abezolirna (saiz in aula saiz auzzalt – gian z’sega naüge sachandarn un åndre didaktìk ativitét); z’èzza un z’slava in famildja odar in kolèdjo vor da gåntz zait boma vort sait; soin draugeschauget saiz in gianan, saiz in khearan bidrùmm von Beleschlånt in auzlånt; in tutor boda nåsteat in studjènt in auzlånt; di sicharom azma hettat zo tüanen bea odar azma hettat zo schedega epparummaz åndarz vor da gåntz zait boma vort sait; mang abegem in esåm zo haba in linguistìk zertifikàt.
In toalnemmar khinten gevorst z’zala an obligatoresche toal, daz mindarste 400,00 euro sin atz, daz mearaste, 1.400,00 euro, nå dar ICEF 2024 boda azukhint von sèll boma hatt inngètt zo haba gebunnt vorz djar 2023 zo maga håm hilfan vor bazma zalt vor in rècht zo studjara un vor di khindar vorz schualdjar 2024/2025, tariffan guat von 1/1/2025 vort un darzuar a kautziong vo 400,00 boda bart khemmen gètt bidrùmm balma bart håm gemacht verte, allz ditza dòpo zo soinase gesichart ke di protzedur khött in di meldung saibe djüst. Di sutdjént bartn mochan abegem an pruf innzomaga tretn, un an lestn an pruf z’sega bida dar studjånt mage abegem in esåm vor da linguistìk zertifikatziong.
In gåntzan izta khent untargelekk vor daz sèll boda khint vürgelekk in disa meldung 1.800.000,00 (vo disan euro 720.000,00 soin untargelekk vodar EU - FSE+, dar 40% vo allz bazta khint gezert).
Zo haba informatziongen makma vorsan dar:
Teritoriàl Struktùr Ad Personam
bege Pranzelores, 69 – 38121 Tria
von menta aftn vraita vo di 8.30 – 17.30
Grümma nummar: 800 163 870 – fax 0461 390707
e-mail: mobilita.fse@provincia.tn.it
Übarsetzt von Schaltarle vor di zung von Toalkamou vodar Zimbar Hoachebene