Der hoff, ver de bersntoler gamoaschòft, hòt pròpe an bèrt as iberaus geat en sèll van oa’vòch haus va de familia. Er ist augòngen glaich pet de gamoa’schòft, benn as en XIII. ont en XIV. jorhundert sai tsidelt kemmen de heachern eirter as de pèrng um Persn en an prozess as noch gaben ist za riven ont as ober trong gahòp hòt schoa’ van an ettlena jorhunderter taitscha pauern as de hoacheimen van zimbern en Trentin, en de Sim Gamoa’n va Vicenza ont as de Lessinipèrng va Verona. De Kirch oder de Grunthearn hom galòkt ver a schòrt va jorzins a stuck grunt en an iatn sidler ver za tea’ s aushòcken, veròrbetn ont verpèssern S doi stuck grunt ist gahoasn kemmen pròpe “hoff”. Va de sèll zait, benn s aa vil gabèkslt ist durch s autoaln en de eredi ont s kaven ont verkaven, ist uman de doin pahalter as tònzt s lem van familie.
De architektur ont de lòntschòft van tol trong gabiss nou hait der druck van òrbetn en de heff, en de boa’n ont en de balder as gamòcht sai’ kemmen van pauern.
Der pasuach van studentn mòcht toal van projekt “De kròft va de sprochminderhait: s bider augea' van a taitsches dorf en sud van Alpn”, Toal nr. 29, projekt “Gem bider bèrt en de òltn paun ont en de lòntschòft van Alpn: kennen òrbetn pet stoa’ ont holz”, gamòcht va TSM|Step Schual ver de Regiar van Grunt ont van Lònt en zòmmòrbet pet de ENAIP, der Noschauger en de trentinische Lòntschòft, der Nationalpark van Stelvio ont s Bersntoler Kulturinstitut.
