S planprozess van nai spitol hòt u’pfònk pet de zòmmòrbet van enteressiartn lender durch an ring - as se zbischn òlderhaileng 2024 ont hourneg 2025 gahòltn hòt - as abia rif gahòp hòt za nemmen au vourtschbinnen ont elementn ver za vinnen der plòtz.
S ist praucht kemmen an metod, unterstraicht Gottardi, as hòt en focus en konzept va “ringtschunthait” (as schauk en òlla de puntn elementn ont as ist gaben der focus van gònze planring, zòmm pet en zòmmòrbetmoment) ont as suacht strategian ont 32 kritern ver za vinnen der plòtz (idoneitet, adress ont programm) as sai’ de elementn as arauskemmen sai’ bail en zòmmòrbetprozess. S ist an metod as gip de moglechkait en lònt za vinnen der peiste plòtz, gèltsgott en de bolten datn, untersuachen ont veròrbetn gamòcht, ont derstellt a sperimentazion as sai’ bart ver de zukunft va de trentiner pianificazion paut af bèrtn ont riven as nèt lai konformativ sai’ abia as hait ist.
S bèrt va de lokalizazion va massima, sok der assessor, konkretiziart se pet en gem en de Tolgamoa’schòft van Tol va Fiemme an metod as kònn zòmmleing de greas van spitol pet de greas van lònt, asou za schaung mearera dinger, van sèlln sanitar, en de sèlln van zòmmlem ont de birtschòft, infrastrukturaln, urbanistik, va de lòntschòft ont va de umbèlt. “S leiste tscherl - sok zan leistn der assessor - bart schaung maisn der punt pet de lokal gamoa’schòft aa ont pet òlla de innrichtn as drinn sai’ ver mearera riven. Ver dòs ist nèt ganua an projekt, va lokalizazion ont va pau, ober s ist noat an “pakt” no en beil as der lòntplan va de gamoa’schòft an rom ist”.
Der iter iaz geat envir pet en moment za lòng en de lait de moglechkait za mòchen bemerkungen ont za gea’ za schaung de beiln dinger as men tea’ miast ver de strategik umbèltschatz pet en rif za gea’ en kurza zait en Provinzaljunta ver za nemmen u’ de lokalizazion va massima.
De dokumentn barn tschickt kemmen en de Tolgamoa’schòft Tol van Tol va Fiemme ver za vòngen u’ der leiste moment, der sèll va definitiv lokalizazion van nai spitol, no en beil as men u’vòngen meing bart der operativmoment, pet en projekt ont der pau va de nai tschunthaitstruktur.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
