Der trèff as s hòt se gahòltn as de òchtzena van merz mòcht toal van a zòmmòrbet schoa’ u’pfònk en oberel van 2020 zbischn de autonome provinz va Trea’t ont de trentinisce Gamoa’n ver en sèll as keart de digital bècksl, iberhaup van dinst online ont van portal web van omtn as en lònt sai’. Der rif ist der sèll za laichtern ont verglaichern de dinstn, iberhaup benn as kimmpt tschbunnen, gamòcht ont verpraucht an dinstn ont de digitalmittln miasn kemmen gamòcht ver bos as de lait ont de bèrkn kennen sa prauchen.
Der provinzal asesor en birtschòft, suach ont òrbet naiòrbet, Achille Spinelli hòt gadenkt as vernaiern ont bòcksn van lokal dinstn sai’ riven as der Trentin schoa’ vour hòt va lonka zait: “Lai en de leiste zait sai ber guat gaben za tea’ de doin riven envire trong, gèltsgott en de òrbet van Schòft, van provinzalstrukturn ont va Trentino Digitale”.
Der asesor Spinelli hòt unterstrichen de zòmmòrbet petn Omt vern digitalbècksl va de presidenz van Ministernrot aa: “S vernaiern ont, nou mear, s digitaliziarn hom noat va zòmmòrbetn, nazional ont internazional, avai der stòttkear miast laicht ont en sicherket drinngea’ kennen en an oa’zegen digital ekosistem, bou as verschbintn de vèrreketn ont s ausanònder van kompetenzn zbischn der Zentralregiar ont de lòntomtn”.
De zòmmòrbet zbischn de Provinz, der Consorzio ont Trentino Digitale hòt schoa’ trong za veròrbetn de mearer schòrt va hilf ver de lait ont de bèrkn ont za digitalisiarn se. Turch de nain digitalkanaln sai’ gòngen en de vourdern mu’netn dinstn abia der èssnbonus, der radlbonus, der roasnbonus ont de qualitetbandi.
An bichtegen plòtz hòt Trentino Digitale, a sistembèrk va de Autonome Provinz va Trea’t. “Der digitalbècksl van Gamoa’n – hòt tsòk der sai’ president, Carlo Delladio – ist an bichtegen punkt ver de birtschòft ont s guatstea’ van lait. Trentino Digitale ist paroatet za versichern òlbe en de Gamoa’n a gònza hilf en prozess va de digitalisasion. Ver dòs – hòt tsòk zan leistn der president Delladio – Trentino Digitale hòt paroatet an nain organisativmodel ont ver en earste vòrt s ist anaugaleik kemmen a nais, ausònders omt ver de lokalnentn. Nia finz iaz s ist gatu’ kemmen an sellen tscherl.”
En vourder schantònderer, de Autonome Provinz va Trea’t hòt untertschrim an zòmmgea’ pet de Presidenz van Ministernrot (Omt ver en digitalbècksl), as hòt abia rif s zòmmviarn de trentiner Gamoa’n prope en de òrbet za digitalisiarn de sai’na dinstn. S oa’negea’ hòt abia rif der switch off van digitalndinstn aa, as men denkt za vòngen u’ af de 28 van hourneng 2021. Van doi to envire, òlla de amministrazionen miasn toalnemmen en de nazional digitalplòttn, abia PagoPa ver za zoln, Spid ver de digitalidentit, l’app IO ver en oa’zege punkt za gea’ drinn en de digitaldinstn.
“Der Trentin – hòt unterstrichen Erika Miglietta van Omt ver en digitalbècksl va de presidenz van Rot – ist a lònt as òlbe zoacht hòt an stòrchn bill za vernaiern ont dòs hòt trong en de riven va hait, gèltsgott en de zòmmòrbet van leistn jarder.”
Der projekt van digitalbècksl van lokal amministrazionen ist no za kemmen gamòcht ont der ist zolt kemmen pet 740 tausnt euro. De òrbet hòt an paitrog gem za pòcken de target riven va de 28 van hourneng 2021 ver òlla de gamoa’namministrazionen.
En de glaiche zait, gèltsgott en Oa’negea’ untertschrim va de Provinz petn regiar va de digitalidentitet Lepida (Emilia Romagna), de trentiner Gamoa’n sai’ galeik kemmen en de meglechkaitn za gem en de sai’na stòttkearn de digitalidentitet Spid ont de elektronische Identitetkòrt aa.
En de mu’netn as kemmen òlla de trentiner Gamoa’n barn meing vourtrong, af de istituzionalsaitn aa, naia on line dinstn u’gahenk en de app IO ont en zolvurm PagoPa, en beil as men drinngea’ meing bart gèltsgott en de digitalidentitet Spid.
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
(Traduzione a cura dello Sportello linguistico della Comunità Alta Valsugana e Bersntol)
