In di månat von höbiat un snitt atz Lusérn, 3 trèff vor di khindar von 6 atti 12 djar
“Spiln azpe biar: giochiamo insieme usando la lingua cimbra”: ‘z hefta å dar naüge kurs azpe biar vor di khindar
Traduzione in cimbro
[Cimbro] Lirnen di zung antånto azma spilt un steat pittnåndar, khennante o da zimbar kultùr. Ditza iz bazta vürkhint in da naüge bèrkstatt von Kulturinstitut Lusérn / Museo Lusérn pinn titl “Spiln azpe biar: spilbar pittnåndar nützante da zimbarzung”, vor di khindar von 6 atti 12 djar.
An okkasióng zo nemprase dar mindarhaitzung pinn spil, pittar kreativitét un vil åndarz, inan umbèlt boma mage lirnen un håm a lustega zait. Naüge börtar, stòrdje un naügez zo darvéra bartn vüarn, bemda nimp toal, inan perkùrs boda di zung bart khemmen eppaz lente un boda alle mang vorstìan. Di gröazarstn bartn machan di aktivitétn pittar maìstra un di khlümmanarstn, untar di 6 djar o, bartn mang spiln un machan èrbatla in a kantóüle pensàrt pròpio vor ditza.
“Balda dar zil iz nèt lai lirnen ma spiln o - khütta di Anna Nicolussi Neff, kultùrarbatar von Kulturinstitut - khintz destrar un ringar lirnen vor ’z khinn. Di zung khint neméar vür lai azpe daz sèll boma mocht lirnen, ma azpe an strumént boma mage nützan z’spila, zo reda un z’stiana pittnåndar. Azma lirnt asó di börtar stian lengar in hirn.”
Di trèff bartn soin an erta, atz 14 von höbiat, atz 4 un atz 25 von snitt, vo di viare fin di vünfe in tages in Kulturinstitut Lusérn. Ma mocht nicht zaln vor di bèrkstatt, tüat innschraimse rüavante å in 0464789645 odar schraibante dar mail anna.nicolussineff@kil.lusern.it.
Di bèrkstatt soin pensàrt vor di lusérnar un vor di lusérnar vo vort. Di khindar mochan soin pinn eltarn.
Übarsetzt von Kulturinstitut Lusérn
(eng)
Immagini
