Ber sai’ en a zait zoakt va pahenna bècksln ont s laven van moderneta pilder ont der antropologese kino ist kemmen an bichtegen mittl ver za gea’ lenksemer schaung ont lesn de bèlt en an tiafeger vurm.
Zbischn de òrbetn as hom toalganòmmen, 30 sai’ de film as barn laven ver en prais:
- 7 lonkafilm - va Algeria, Osteraich, Belgio, Burkina Faso, Cina, Frankraich, Iran
- 5 hòlbalonkafilm - va Balschlònt, Niderlander, Senegal, Turchia
- 11 kurzafilm - van Brasile, Federazione russa, Groenlandia, Indonesia, Balschlònt, Moldavia, Palestina, Poln, Portogallo, Turkai, Ucraina
- 7 kurzafilm va de Sezion van jungen - va de Colombia, India, Indonesia, Balschlònt, Regno Unito, Tagikistan
Zbischn de filmmòcher austschaukt, 11 sai’ baiber ont 19 sai’ mander: òndra schaung ver za derzeln, an iatn en an aigene vurm asou abia òlla onderst sai’ de lem van lait. Simazboa’sk van draisk film sai’ kemmen galok schaung ver en earste vòrt - 6 en de bèlt, 15 balschlònt, 6 regionaln - dòs ist a jorprais guat za klaum au de pestn òrbetn en de gònze bèlt nou vour as de kemmen galòk sechen en de òllgamoa’schòft.
De òrbetn barn kemmen araustschauk van an auskenneta praisgericht gamòcht va kino auskenneta lait, studiareta en etnografische ont antropologesche lear, kultur ont giornalistesche lear, as barn gem viar prais en de pestn òrbetn zbischn de sèlln as sai’ kemmen tchèrlt en de doin kategori:
- documentarn va lonkafilm: prais 3.000 euro
- documentarn va hòlbalonkafilm: prais 2.000 euro
- documentarn va kurzafilm: earsteprais 1.500 euro; zboateprais 1.000 euro
S barn kemmen gem aa zboa prais (“Junga Prais”) en de pestn òrbetn gamòcht va studentn va kinoschualn, universitatet ont akademi, va zait nèt mear va 30minutn:
- earste prais va 1.500 euro
- zboate prais va 1.000 euro
De òrbetn tschèrlt barn kemmen galòk schaung kan Teatro San Marco va Trea’t, en vraita as de 16 ont en somsta as de 17 van schanmikeal um naina zobenz. En nomitto van sunta as de 18 van schanmikeal, va um 15.00 finz um 18.30, òlla de film as hom gabungen.
Inntritt vrai ont a’ne zoln en òlla de film.
Derzua ont as de internetsait der gònze programm https://www.museosanmichele.it/




