S sèll as der er galept hòt, as men kònnt vinn en de sai’nen topiacher aa, ist drinngaleikt en de gschicht “Grigia” as Palai paschraip. Der protagonist va de gschicht ist nèt an kriager, s ist an ingenger van gruam as se hoast Homo ont as se vinnt en an nèt gònz an guatn moment van sai’ lem. Benn as der kriak an priaf van a firma ver za nemmen toal van a spedizion za tea’ bider au òlta goldgrum en Bersntol, nimmp er s u’ ont toalt se va de familia. S doi trentinische Tol, as ver de sai’n ang ist an òltfateschas, an isoliarts ont pet an ekstrega lòntschòft, en Homo kimmp en schubet vir abia a “verzauberta bèlt”, an encantareta bèlt bou as de aspektn van komisch, van ekstrege pet a schòrt va hèckserai ont va taivlerai van Musil ibertrim kemmen. En de gschicht sai’ paschrim de paun, de lòntschòft, de architektur, de òrbetn van lait ont aa s bersntolerisch hòt an sai’negen bèrt. De doi sproch kimmp van Musil gahoasn abia “Zaubersproch”.
Ibersetzt van BKI
