Bichte va de naikait ist der paitrog va de Autonome Provinz va Trea’t, pet an heacher zuazol en 2027 van 2026, va 94.623,04 en 105.000 euro.
Studium, òrbet, òrbetbèrkn, zivildinst, ober vraizait aa ont lemring en asulònt: s tirl gip nochrichtn ont orientiart en òlla de temen as en de jungen enteressiarn. Ber as drinngeat vinnt lait as paroatet sai’ za gem an earste be ont a hilf ver za verstea’ bou za vòngen u’. Ont nèt lai, G+ ist an Eurodesk punkt, s europeische nètz as gip nochrichtn en de jungen iber en de moglechkait va studium, òrbet ont vraiòrbet aus va Balschlont.
Der haupsitz vinnt se en via Belenzani 13 ont ist offet van ma’ta finz en vraita. Ober s tirl plaip nèt sperrt drinn en de mauern van omt. S vinnt se drinn en nai Spazio Giovani Contentissimo aa, ver za trèffen de jungen en de platz as sa schoa’ lem ont ver za trong nochrichtn ont moglechkaitn.
Ont nou, bail en jor G+ organisiart orientiarungtrèffen en de schualn van Trentin ont semm s mòcht tirlòrbetn en de gònze provinz, ont asou der gip an dinst en de lait as lem en de telder, vèrr va Trea’t.
Zan leisnt, vill sai’ de naikaitn organisiart. De earste ist garo garift: af de 22 ont 23 van schanmikeal G+ hòt organisiart en Contentissimo de Fiera della Mobilità Internazionale “Go!”, as zòmmgariaft hòt sechs hundert lait. De hom toalganommen en de naikait de Autonome Provinz va Trea’t, Ad-personam, de Universitet va Trea’t, Eures, Euregio Europe Direct Trentino ont kan a zboa’sk vraischòftn ont bèrkn as òrbetn ver de internazionalroasn. Bail en event, de sai’ boletn gaben de ploudern pet de aussteller.
Der ònder trèff bart se hòlten en langes pet de Fiera delle Opportunità Estive.
Mearer nochrichtn iber en de moglechkaitn af de sait www.sportellogiovanitrentino.it
Ibersetz gamòcht van Sprochtirl va de Tolgamoa'schòft Hoa Valzegu' ont Bersntol
