An iniziatif va de Vrai Universitet va Poazn ver de student van hoachnschualn va Sudtirol

S bersntolerisch aa en To va de òlt Mearsprochegkait

[Mòcheno] Der To va de òlt Mearsprochegkait, as va mearer jarder gahòltn kimmp, kimmp organisiart va de Universitet va Paozn en sitz va Priksen ver za gem en de studentn van ladinischen ont van taitschn hoachnschualn van Sudtirol elementn za meing verstea’ abia as auschaukt ont abia as ist s lem van sprochen as va òlta zaitn sai’ en Trentin-Sudtirol.
Van mearern bèrkn as de studentn gamòcht hom en de Universitet, oa’n ist gaben as en bersntolerisch. S ist nèt asou vèrr van taitsch ont iberhaup van sudtirolerische dialekt ont asou de studentn hom kennt ibersetzn kurza sòtzn en de sproch van inser Tol.
De iniziatif hòt birkle pfòlln nèt lai ver en bèrt va de sproch, ober aa bavai de gep pakònnt der groas bèrt va de mearsprochegkait ont abia raich as ist de inser region pet sprochen as velaicht nèt va souvle vil lait klòfft kemmen, ober as bichte sai’ gor ver de gònz mentschhait.