Martedì, 09 Febbraio 2021 - 11:05 Comunicato 306

Traduzione in ladino
Provinzia, Consei de la Autonomìes, Comuns: na colaborazion per se emprevaler de la oportunitèdes che vegn sport da l’Europa

Aproà da la Jonta un Protocol de cordanza

Na colaborazion più fona anter la Provinzia autonoma de Trent, l Consei de la Autonomìes e ence l’aministrazions di comuns, per se emprevaler, tras cordanza, de la oportunitèdes che vegn sport da l’Union europeèna, avisa di fons struturèi gestii da UE a na vida direta (tras l’azion de la Comiscion, che met fora avisc e garejèdes) opuramenter no direta (dessema coi Stac e Regions). Chest l’obietif del Protocol de cordanza de chel che l test l’é stat aproà ai 29 de jené da la Jonta provinzièla, aldò de la proponeta de l’assessor ai Enc locai Mattia Gottardi. Dut chest vegn cà da la consaputa che chesta sort de entervenc, per l svilup local, i cogn vegnir dezidui tolan ite la realtèdes enteressèdes e spartian dessema i obietives, i strumenc, la modalitèdes de esecuzion. Con chest endrez Provinzia e Enc locai i vel gestir ti egn che vegn i programes che fèsc referiment a la programazion europeèna 2021-2027 estra che la prospetives metudes dant da entervenc strategics desche Next Generation EU o l Recovery Fund. “Cognon se enjignèr a se emprevaler miec che l’é meso de la oportunitèdes che ne vegn sport da l’Europa – sotrissea l’assessor Gottardi -e per l fèr cognon fèr lurier de grop. Tor ite i Comuns, se emprevaler de personal co na formazion adatèda, se lascèr su capazitèdes ùtoles per portèr dant programes dessema, sarà elemenc strategics. I empegnes scric ite tel Protocol aproà, de chi che i contegnui i é stac spartii col Consei de la Autonomìes, i va apontin envers chesta direzion”.

Anter i entervenc de l’Union Europeèna classifiché desche “no direc” de emportanza particolèra per l Trentin l’é chi che perveit la doura de fons struturèi e de investiment, che revèrda i raions rurèi e da mont, scialdi te condizons de desvantaje o con pecia jent. Vèlch un di obietives strategics de la Politica de coejion 2021-2027 i revèrda “na Europa più vejina ai sentadins, che deide la strategìes de svilup gestides a livel local e n svilup urban sostenibol te duta la UE (OS5)”. Chest obietif l se emprevel de strumenc de investiment sul teritorie integrè, per chi che ge vegn domanà a la comunitèdes e a la aministrazions dal post de aer na pèrt fondamentèla.

Per chel che revèrda i intervenc europeans “a gestion direta”, enveze, l’é sacotenc programes e scomenzadives, ti desvalives setores e materies, desche la green economy e la promozion de l’economìa digitèla, a cheles che se pel ruèr tras la partezipazion a garejèdes de concors che les perveit de tor ite sogec dal post e n gran “lurier de grop”.

Chel che aboncont l’é emportant, l’é che i programes europeans tol ite no demò i Stac membres ma ence la Regions, la Provinzies autonomes e i enc locai, dessema ai sogec che se cruzia de enrescida, ai sogec economics e a la autra realtèdes teritorièles.

L Protocol aproà en vender ai 29 de jené l porta dant, donca, de engaissèr la Provinzia autonoma e i comuns a tor pèrt a la scomenzadives de l’UE e a etres canai de finanziament metui a la leta dai sogec internazionèi (fondazions e organisazions internazionei).

Anter i obietives troé fora dal document, en curt:

  • creèr a livel de aministradores locai na sensibilità per se emprevaler de ressorses tras strumenc encomai essenzièi (ence se senestres) desche chi europeans;
  • mantegnir agiornèdes a dò a dò la informazions en cont de oportunità che l’é a la leta e da poder durèr;
  • endrezèr cognoscenzes e abilitèdes coi sogec pertinenc sun desvalives livìe, per meter en esser rees, pissèr intervenc, tor pèrt a la projetazion e a la metuda en doura de proponetes de projec inovatives;
  • endrezèr momenc de sensibilisazion e formazion per i aministradores e per i operadores di Enc locai en referiment a la oportunitèdes che vegn sport da l’Union Europeèna e renforzèr la capazitèdes de la aministrazions de portèr dant e gestir projec e scomenzadives a livel europeèn e internazionèl;
  • creèr rees teritorièles dessema con etres sogec publics, tout ite sogec che se cruzia de enrescida, sogec economics e autra organisazions;
  • portèr dant tinùltima projec coletives Provinzia/Enc locai sui argomenc de intervent.

La informazions de ùtol les vegnarà metudes ite te na piataforma informatica e sparpagnèdes fora tras na newsletter aposta che vegnarà fora a na vida periodica aldò de chel che l’é stat stabilì tel program de lurier de l’an. Te la medema piataforma, i enc locai i podarà spartir coi etres sia opinions per enrescir i partner per i projec.

L Protocol restarà en doura enscin a canche se serarà sù la programazion europeèna 2021-2027 e ence la prospetiva de intervent strategich che à inom Next Generation EU e l podarà vegnir renovà aldò del temp de regnèda de la programazion europeèna che vegn.

A l’Unità de Miscion Strategica coordenamaent enc locai, politiches teritorièles e de la mont, aldò de l’endrez metù dant da l’assessor competent en cont de Enc Locai e Raporc col Consei provinzièl, ge vegn dat sù l doer de compagnèr e meter en doura l protocol che revèrda la Provinzia autonoma de Trent.

Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)

(cdt)


Immagini