Zbisnen in hilfan vodar European Union boda nèt soin garade vürgevüart vo disarn, vor in Trentino khemmenda z’soina bichte di sèlln boda ågian in lentar von pèrng, boda soin hèrta hintar gedjukht peng in bintsche laüt bodada lem. Zèrte stratègesche ziln vodar Politika zo legase panåndar vor di djar 2021-2027 gian å in “an Europa nemprar in pürgar boda vürlekk strategìan vürgetrakk garade von lentar un boda mang khemmen augehaltet in da gåntz EU (OS5)”. Vor disan zil hattma mångl struméntn boda innvången alle un vor ditza di vüarom von lokàl emtar mochan soin vorånavür.
Vor bazta ågeat, anvétze, di hilfan vürgevüart garade vodar EU soinda ettlane progrémm un prodjèkte in mearare beraich, zbisnen disan di green economy, di didjitàl ekonomì, aftz dise makma nemmen toal lai durch konkorse boda vürleg, dise o, z’arbata pittnåndar in mearare.
Daz bichte, komunque, iz ke afte european progrémm tarfanda nèt nemmen toal lai di State, ma Redjongen, autonóme Provintzàn un lokàl Emtar, pittnåndar pitt alln in teritoriàln feroine.
Dar Protokòll ågenump an vraita atz 29 hoachnach lekk vür zo macha nemmen pezzar toal dar autonóme Provìntz un in kamöündarn in hilfan voda EU un azta beratn åndre hilfan o untargelekk vo internatzionàl istitutziongen.
Zbisnen in ziln boda soin darkhennt in disan briaf khurtz makma auroatn:
- süachan zo macha vorstian in lokàl vüarar zo geba vèrt un åzonemma di hilfan nützante struméntn boma haüt nèt mage tüan pitt mindar zo nütza (siånka azza nèt soin dèstar) azpe di sèlln untargelekk vodar Europa;
- haltn hèrta nå in allz daz sèll boda iz zo bizza un zo maga nützan;
- abelirnen laüt boda mang arbatn atz alle di livèlln zo maga herrichtn nètzan, auleng prodjèkte un vürtrang naüge sachandar;
- herrichtn moméntn zo boroata di vüarar un di ågestèllte von lokàl Emtar aftaz sèll boda mage opfarn di European Union un lirnen innzogeba internatzionàl prodjèkte;
- auleng teritoriàl nètzan boda leng panåndar öffentlesche emtar, pitt feroine boda machan nåsüach, ekonomike gesèllschaft un åndre organizatziongen;
- un an lestn inngem prodjèkte pittnåndar: Provìntz un lokàl Emtar atz zèrte tème.
Allz bazta iz zo bizza bart khemmen gelekk aftna informatege plattform un darzuar gemacht bizzan alln durch inar newsletter nå in sèll boz bart soin dar djarege progråmm. Afta gelaichege plattform di lokàl Emtar bartn mang drauleng un machan khennen soine idee un asó magatnsa vennen naüge partner auzolega di prodjèkte.
Dar Protokòll bart varlérn sin balda bart soin verte da gåntz european programatziong 2021-2027 un sin azta bart khemmen augelekk da strategesche hilfe gehoaztNext Generation EU un bart mang khemmen vornaügart haltante kunt vodar zait boda bart soin mengl vor da european programatziong boda khint.
Dar Unità di Missione Strategica boda drauschauget afte lokàl emtar un afte teritoriàl politike un vor di pèrng bartar khemmen zuargètt, stianante nå in sèll boda vürlekk dar Asesór boda hatt kompetzéntz afte lokàl emtar, zo stiana nå un un vürzotraga in Protokòll boma sait drå zo reda ditza vor bazta ågeat dar Autónome Provìntz vo Tria.
Übarsetzt von Schaltarle vor di zung von Toalkamou vodar Zimbar Hoachebene
(Traduzione a cura dello Sportello linguistico della Magnifica Comunità degli Altipiani Cimbri)
