“La composizion che à arjont l prum post la vegnarà durèda desche fanfara ofizièla de Arge Alp en ocajion de evenc, su la homepage, desche sigla video e desche element de recognosciment de chesta comunità de diesc regions, Länder e Ciantons di cater paìjes Germania, Tèlia, Austria e Svizra”, recorda l Landeshauptmann de Salzburg Wilfried Haslauer, president de Arge Alp.
“L’é mie prum gran suzess te n concors e son dassen content de aer vent sobito n concors sci gran e che va sorafora la seides”, coscita Valentin Gasser à comentà sie suzess.
Gasser l’é nasciù del 1991 a Busan, sie père ge à fat sia pruma lezion de saxofon e enscin al 2010 l’é jit a la scola de mùsega de Busan. Da canche l’à doudesc egn l’é comember de la Mùsega de San Quirino. Dal 2010 al 2018 l’é jit a l’università de Mùsega e Èrt de Viena (che aea inom Konservatorium Wien Privatuniversität), dant saxofon – jazz e dò composizion – jazz e arangiament. L’à tout pèrt a sacotenc workshop te l’Europa zentrèla e l’é stat arlief de Bobby Watson, Bob Mintzer, Jim Snidero e Eric Alexander. Da l’istà del 2018 Valentin Gasser l stèsc endò tel Sudtirol, l’ensegna a la scola de mùsega de Busan e l sona, l scrif mùsega e l se cruzia de l’arangiament per desvalives projec tant de mùsega jazz che de mùsega classica e de mùsega de mùseghes sinfoniches.
La jurìa locala l’aea cernù la composizion de Sebastiano de Salvo desche composizion miora anter cheles vegnudes cà dal teritorie provinzièl.
Diesc comembres te cater stac.
Da canche del 1972 la é stata metuda sù, l’Arge Alp l’é na emportanta rei de cooperazion che va sorafora la seides che se cruzia de la prioritèdes del raion de la Èlpes, soraldut tel setor ecologich, culturèl, sozièl e economich. La cooperazion tol ite ti cater stac Germania, Tèlia, Austria e Svizra chisc ciantons / regions / provinzies, con presciapech 26 milions de jent: Trentin, Sudtirol, Baviera, Salzburg, Tirol, Vorarlberg, Lombardìa, S. Gal, Ticino e Grijons.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
