L Trentin l à jà na gran esperienza te chest ciamp de gra al projet european LIFE FRANCA, con chel che se à scomenzà a durèr strumenc inovatives per l’informazion e la partezipazion, col tor ite ence aministradores dal post, families e studenc. Gran fazion à abù l lurier fat coi studenc de la scoles mesènes che, tras laboratories e materiai didatics de informazion – ence n comics ad hoc – i à podù tor su neva cognoscenzes e comportamenc drec da ge fèr cognoscer ence a la jent grana.
L nef projet, leà al Program Strategich de Arge Alp en cont de la “Gestion dantfora di risesc naturèi e de la catastrofes”, l dajarà l met de meter chesta esperienzes te n sistem, coscita da fèr n confront con cheles fates te la autres regions de la Èlpes e poder svilupèr dessema strategies de comunicazion. Trentin, Lombardia, Tirol, Salzburg, Canton Ticino e Sudtirol i lurerà dessema, col didament de l Bayern, de i Grischun e de Vorarlberg, per troèr fora codejes e strumenc da poder durèr duc, coscita da endrezèr na basa culturèla dessema per ge dèr maor segureza a la comunanza de dut l raion de la Èlpes.
Ti doi egn de atività del projet, vegnarà endrezà momenc de confront anter tecnics e aministradores, workshop per la popolazion e scomenzadives spezifiches per chi che laora e chi che va a scola e, tinultima, n convegn olache vegnarà portà dant i resultac che se à arjont. L projet, finanzaià da Arge Alp per na speisa de 120.000 euro en dut, l é un di projec de maor emportanza de la Comunanza de lurier, che te duta sia scomenzadives dantdaldut la peissa al stravardament del ambient, al adatament ai mudamenc climatics e a l’educazion de la neva generazions.
Arge Alp l é na Comunanza de lurier metuda su ai 12 de otober del 1972 a Mösern, tel Tirol, con chela de ge fèr front e sostegnir i besegnes de duc i raions de la Èlpes e che tol ite presciapech 26 milions de persones.
I membres de Arge Alp l é la Germania col Stat Ledech de Baviera, l'Austria col Länder Vorarlberg, Tirol e Salisburgh, la Tèlia co la Provinzes autonomes de Busan e de Trent e la Region Lombardia, la Svizra coi Chantun Grischun, Son Gagl e Tessin.
Traduzion di Servijes Linguistics e Culturèi del Comun general de Fascia
