Traduzione in ladino

“Pedies”: per en sabeda ai 5 de oril vegn fora la puntata #480 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata nr. 480. I argomenc de chesta setemèna. En domenia ai 30 de oril a Ciampestrin l é stat festa grana per i 200 egn de la Gejiola dedicada a la Madona de Lourdes. 200 egn de storia metuda ensema tel nef libret dat fora te chesta ocajion dal Comun de Mazin.
Sun Ciampedie i studafech de Fascia se à dat ju co na ejercitazion de mèl da fech anter neif e dificoltèdes logistiches; duc i gropes de val à lurà dessema coordené da na postazion zentrèla per ge fèr front a na situazion stentousa.
“ComunicAzions” l nef podcast plurilingual metù ensema dai studenc de la classes quintes del linceo ladin di lengac l é a la leta sul canal YouTube – TV Ladina e sun Radio Fiemme 104; la studentes e i studenc i à abù l met, dessame coi professores de lengac, de fèr n percors de formazion, scriver e registrar n podcast per ladin e duc i lengac studié a scola: todesch, ingleis, spagnol e rus.
Tinultima te la rubrica “Piates: chel liber sun scancia”, Alberta Rossi bibliotechèra de la biblioteca Pare Frumenzio Ghetta de la Majon di Fascegn, la ne porta dant il "Postiglione delle Dolomiti": na regoeta de sfoes publiché dal 1957 al 1984 per endrez de Guido Iori Rocia.