Manà fora su Trentino Tv l program l vegn endrezà dal Comun General de Fascia

“Pedies”: per en sabeda ai 31 de mé vegn fora la puntata #488 del program ladin per la televijion

“Pedies”: per en sabeda ai 31 de mé vegn fora la puntata #488 del program ladin per la televijion
Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 488.
I argomenc de chesta setemèna l é:
L Procurador l à nominà la Jonta del Comun General che la sarà metuda adum da 6 comembres. Per esser operatif l ent l à de besegn che vegne metù su l Consei general co la nomina de 12 conseieres da pèrt di comuns e do se podarà jir inant co la nomina de la desvaliva comiscions. L Procurador l à dit ence de voler lurèr en colaborazion e sinergia coi ombolc.
En mèrtesc ai 27 de mé l é stat portà dant l Pat educatif per la comunanza de Fascia. L é l resultat de n percors peà via del 2017 per endrez del Comun General e l à tout ite la scola, i servije sozio-assistenzièi, copratives sozièles e desvalives educatores de sociazions sportives. L obietif l é chel de lurèr dessema al fin de na crescimonia sozièla positiva outa al ben di bec e de duta la bezes. Te chest percors vegn tout ite ence la families per les didèr a ge fèr front ai besegnes di fies che cresc e che muda.
Enche chest an, en ocajion de l’Aisciuda Ladina, Bertol l é stat l protagonist de la scoles de Fascia. Chest bez zenza età, feruscol, curious e misterious, simbol del lengaz e de l’identità ladina l é jit te duta la scolines de Fascia a se portèr dant. Con so nès lonch, ciuzé gregn e mans con cater deic, l soscedea na marevea ti bec. L ge à contà de lengaz e cultura ladina e l ge à portà en don na ciutra da se tor do canche se va sa mont.
La raides de l’Aisciuda Ladina, dedichèdes a la toponomastica, enfin ades les é states fates entorn l paisc de Moena e l raion de la Mont da Vich. Te la pruma raida col didament del menatroes Giorgio Poschiavin e del giagher Leonardo Cocciardi l grop l é jit a cognoscer i veies termegn che segnèa i confins anter l prinzipat del Piscop de Trent e chel de Persenon. L’autra raida enveze col didament de Damiano Lorenz la é stata fata dal Capitel de Chiusel fin forin Mont da Vich con poesies de Père Frumenzio Ghetta e desvalives toponimes che conta de jent, de storia e de fac.