Manà fora su Trentino Tv l program l vegn endrezà dal Comun General de Fascia

“Pedies”: per en sabeda ai 30 de aost vegn fora la puntata #501 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 501. I argomenc de chesta setemèna.
Gran festa a Col per i 20 egn del Istitut cultural ladin Cesa de Jan, nasciù per voler di ladins de Fodom, Col e Ampez, anchecondì sot Belun, che no i vel desmentièr sia reijes e si leames storics e identitères. Raprejentanc del mond politich e culturèl del Sela à tout pèrt al event per esser apede ai jormegn de Soramont te chest dì emportant dal pont de veduda storich, culturèl e identitèr.
En jebia ai 21 de aost, te la bela cornisc del Mèsc Agua Biencia a Pera, i raprejentanc de la firmes di impianc portamont de Fascia à endrezà n moment dal gran segnificat simbolich: na scontrèda coi raprejentanc de la istituzions per se confrontèr, portèr dant la neves e per ge sporjer n bel don al Procurador Edoardo Felicetti, simbol di 50 egn de Dolomiti Superski, na realtà che te duc chisc egn à desmostrà che la forza la vegn dal grop.
Tinultima, te chesta puntata vegn portà dant n nef apuntament de la rubrica “Lesc: cuchèr te ogne piz e cianton”. Raffaele Rizzi, enrescidor de storia locala, ne conta de Fontanac, na picola vila spartida anter Fontanac de sora e de sot, con gran curiositèdes. Se pel troèr l inom de Fontanac “Locum Vundenates in Nevis” tel prum e più antich scrit che rejona de Fascia, che l é del 1143.