Traduzione in ladino

“Pedies”: per en sabeda ai 29 de mèrz vegn fora la puntata #479 del program ladin per la televijion

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata nr. 479.
I argomenc de chesta setemèna l é: Gome Neve, l grop de robotica de la Scola Ladina de Fascia che l é jit a Genova per dèr endesfida a 37 gropes da duta la Tèlia per la finèla nazionèla de la First Lego League. La competizion la é metuda adum da desvaliva proes: la garejèda de robotica, l projet scientifich e chel tecnich. Anter fadies e tropa garejèdes i tousc e la touses de la Scola Ladina i à vent la calificazion per jir de jugn tel Massachusetts a raprejentèr la Tèlia a la FIRST LEGO League WPI.
Do doi egn da canche l é stat metù su l Comitat Gregn Evenc aon rejonà con Fausto Lorenz, President de l’APT de Fascia, che l ne à contà de chesta esperienza, di obietives arjonc e de chi per l davegnir che chest comitat, nasciù apontin per didèr l endrez de evenc de nonzech a livel burocratich e aministratif, l se met dant.
Tinultima te Pedies de chesta setemèna porton dant n auter apuntament de la rubrica “Svampol ciatarul: jent che fèsc jerveèr sie cunst”, te chel che Giorgia Felicetti, na joena aspiranta menacrep, la ne contarà de sie percors e de sie gran gust per la mont.