Manà fora su Trentino Tv l program l vegn endrezà dal Comun General de Fascia

“Pedies”: per en sabeda ai 23 de aost vegn fora la puntata #500 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 500. I argomenc de chesta setemèna.
Acà diesc egn, de oril del 2015, l é vegnù fora la pruma puntata de Pedies, program de informazion per ladin. Enlouta a portèr dant chest nef projet l era Martina Debertol. Anché, rué a la puntata numer 500, volon ve meter dant na puntata spezièla per ge jir do a la storia de chest projet: da sia ideazion a sia “messa in onda”. Aon tout su la intervistes de chi che, acà diesc egn, se à pissà l projet, col didèr a meter a jir na ousc de informazion per ladin. No menciarà vèlch retroscena sul lurier che la redazion fèsc vigni dì e che de zenza resta sconet.
Te la rubrica “Svampol ciatarul: jent che fèsc jerveèr sie cunst” ve fajon cognoscer Giovanni Chiocchetti – Kamiz e sie gran gust per tecnologia, foto e video, da chel che l é vegnù fora n passatemp dassen curious. De fat con na stampanta 3D l rua, con gran atenzion per l detai, a fèr picoles reproduzions de paesajes e soraldut frabicac.