Traduzione in ladino

“Pedies”: per en sabeda ai 21 de jugn vegn fora la puntata #491 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 491. I argomenc de chesta setemèna.
Via per de mé la sozietà del Hockey Club Fassa la se à binà per renovèr la encèries del diretif. Desche President l é stat lità Gaetano Rasom che l rejarà la squadra apede a n Consei de aministrazion jà colaudà ajache l é restà ite desvalives membres da dant. Chest renovament l pel didèr a portèr neva gaissa te duta la Val per i pascioné de chest sport.
“Birrette e Ciacoles”: n event fora de anter endrezà da n grop de joegn de Fascia sul stil de la “Libreria umana”. I “libres” porté dant l era apontin persones curiouses che à volù contèr sie percors e sia realtà: da chi che se cruzia de agricoltura, o de n turism con più consaputa, enscin a chi che laora tel ciamp scientifich. Stories desvalives, ma leèdes anter de eles dal gust e la pascion di protagonisć. “Birrette e ciacoles” l fèsc pèrt del projet “Lédec”, n acronim gustegol che fossa “l é dut n craut”, na scomenzadiva che se met dant de valorisèr realtèdes pech cognosciudes te Val.
N nef apuntament de la rubrica “Lesc: cuchèr te ogne piz e cianton”. Chesta outa sion jic a cognoscer una de la viles de Vich. Te na piana a soladif a 1500 metres, anter l bosch e l ciel, l é Tamion. N lech olache somea che l temp no passe, olache vigni cianton conta de sia storia; n lech chiet, mingol sconet, n melaur de storia e tradizions.