Manà fora su Trentino Tv l program l vegn endrezà dal Comun General de Fascia

“Pedies”: per en sabeda ai 2 de aost vegn fora la puntata #497 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 497. I argomenc de chesta setemèna.
La squadra Nazionèl a Talièna de balon de la Monies la jià te Fascia contra na squadra de eles de la val. L sport desche strument de comunicazion, bon de portèr dant messajes de valuta, valores fons desche inclujion, dialogh e testimonianza del vangele. Chest l é en curt chel che la monies se met dant con chesta squadra. Te chèder de la scomenzadives de “Ispirazioni d’estate” apede a la partida, l é stat metù a jir n moment de confront e debatit con suor Annika Fabian, capitana de la Nazionèla Talièna de la Monies, e Moreno Buccianti, alenador e fondador de la Nazionèla Talièna di Preves.
La mostra dal titol “La Dolomites patrimonie mondièl Unesco endrezèda da la fondazion Dolomites Unesco te biblioteca de Comun de Sèn Jan. Chiò se pel amirèr i fenomens geologics e ence l paesaje dolomitan adatà ti secoi al viver de la jent. Con chesta sort de scomenzadives la Fondazion Dolomites Unesco, apede a fèr cognoscer che che l é la Dolomites, la vel ence renforzèr l coleament col teritorie acioche la jent la posse entener semper de più la valuta de chisc teritories naturèi che i cogn vegnir stravardé e rencuré ence per l davegnir.
Tinultima, te chesta puntata vegnarà portà dant n nef apuntament de la rubrica “Zebicher: per veder più davejin” e per l’ocajion sion jic te Fodom a descorir la minieres più emportantes de la Ladinia: la minieres del Fursil. Da chiò vegnia ciavà fora na sort de fer n muie aprijià e domanà dutintorn. Milly Crepaz, del Istitut Cultural, la ne contarà de la storia, de la vita di minadores e de l’emportanza che aea n’outa chesta realtà per Col de Sènta Luzìa, pont de referiment per la gestion aministrativa e economica de chesta ressersa col Vescof e Prinz de Persenon e coi lesc dutintorn.