Traduzione in ladino

“Pedies”: per en sabeda ai 19 de messèl vegn fora la puntata #495 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 495.
I argomenc de chesta setemèna. En domenia ai 13 de messèl l é stat te Fascia la Di dla Unité Ladina, endrezèda da la Union Generèla di Ladins dla Dolomites. Chest dì l é stat na ocajion per uzèr fora l valor de l’unità di ladins e, chest an, ence per recordèr i 70 egn de fondazion de l’Union di Ladins de Fascia e i 50 egn del Istitut Cultural “Majon di Fascegn”.
La 27eisema DoloMyths Run à endrezà na fin de setemèna de gran sport te la Dolomites, con trei garejèdes de corsa, de 12, 22 e 42 chilometres che à portà te Fascia più che 850 atlec da 27 Nazions. N event internazionèl che encanta atlec e spetadores.
I Scizeres de Fascia i à endrezà sun Pas de le Sele, sun Sèn Pelegrin, na zerimonia de comemorazion en ocajion di prumes 10 egn del projet “An der Front”. Del 2015 defat, a recordanza de la Gran Vera e de chi che te chi egn i ge à jontà sia vita, l era stat metù ju Crousc de fer dutintorn i confins del veie Tirol. Per l’ocajion à tout pèrt a la giornèda gropes de scizeres dal Südtirol e ence da l’Austria.
En lunesc ai 14 de messèl, do doi egn e mez de lurieres scomenzé de otober del 2022, l é stat inaudà i neves trampolins del saut de Pardac. I prumes a aer l onor de sutèr sui doi trampolins neves l é stat Annika Sieff e Iacopo Bortolas, campions da Fiem. Tel nef stadie del saut de Pardac, renovà e modern, vegnarà fat la garejèdes del Fis Nordic Summer Festival, endrezèdes dai 18 ai 21 de setember te Fiem.