Traduzione in ladino
“Pedies”: l é fora la puntata #471 del program ladin per la televijion
Manà fora su Trentino Tv l program l vegn endrezà dal Comun General de Fascia
[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata 471.
I argomenc de chesta setemèna l é: a Someda, sora Moena, l é stat metù ju na Stolpersteine - pera de recordanza - dedant a la cèsa olache Richard Löwy e sia familia del 1944 i é stac pochené dai todesć aldò de la lege razièles. N proejet metù a jir da la clas 3B de chest an e del an passà de la scola mesèna de Moena e dal Comun, per recordèr chest om che tant à fat per l paisc e sie sentadins jà endèna la Gran Vera; te Tublà da Nives a Selva l é stat orì la neva mostra/projet de Ismaele Soraperra da Gries dal titol: Träume/Vanishing. L artist fascian, con 4 momenc te 4 sale, l à metù en contrapojizion ensomesc e dijilujions di joegn, col meter dant n pont de veduda desferent. La mostra la é averta duc i dis da les 3 domesdì fin les 6 da sera, enfin ai 21 de firé; anter sport, festa e solidarietà la Marcialonga à endò dat spetacol con na fin de setemèna da color. La 52° garejèda de paslonch più cognosciuda de la Tèlia l é stat n moment de sport che à tout ite duc co la Baby, la Mini, la Young, la Story e la Stars; la scritora badiota Daria Valentin la ne à portà dant sie projet: i Minidiz. Dizionères ladins – te la variantes badiot, gherdener, fascian e fodom - che ge fèsc cognoscer l lengaz, ma ence cultura e tradizion ai ghesć taliegn, todesć, ingleisc, franzousc e spagnoi.
I report de chesta setemèna, enjigné da Riccardo Zanoner, Angela Pederiva e Sabrina Riz, i vegn porté dant da la ousc de Angela Pederiva.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Sudtirol, “Pedies” l va fora su Trentino Tv vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
Con chesta setemèna se pel veder l program ence sun AltoAdige TV vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link: https://www.youtube.com/@TvLadina
Se pel veder i servijes un a un su la piata Facebook de TV Ladina: https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
(cdt)
Immagini