Traduzione in ladino

“Pedies”: l é fora la puntata #469 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata 469.
I argomenc de chesta setemèna l é: “Jent de Fascia”, la puntata la pea via co la scomenzadiva editorièla e teatrèla metuda a jir dal Istitut Cultural Ladin “Majon di Fascegn” che oramai la è doventèda n apuntament anual n muie spetà da duta la jent. Col didament de la bibliotechèra Alberta Rossi l report l porta dant duta 4 la publicazions de la regoeta “Jent de Fascia” con aspec e fac che revèrda i desvalives protagonisć; la garejèdes de telemark state sul Jouf de Ciareja ai 15 e ai 16 de jené les à vedù na bona partezipazion de spatadores apede che de atlec. Chesta garejèdes defat les perveit desvaliva disciplines desche l slalom, i sauc, utèdes paraboliches a 360° che soscedea gran curiosità; “L Itiosaur de Secëda” chest l é l titol de na publicazion neva dedichèda a chest animèl presistorich che l vivea tel mèr de la Dolomites acà 241 milions de egn. Se trata de na coedizion anter l Museum de Gherdena e l Istitut Cultural Micurà de Rü. L test, scrit te 3 lengac ladin, todesch e talian, l met dant a na maniera scientifica aspec leé a la geologia e a la paleontologia del raion dolomitich olache l è stat troà i fossii del Itiosaur; l Zenter de Paslonch de Alochet l é n lech belebon cognosciù per chi che fèsc chest sport. Chest zenter, apede l Jouf de Sèn Pelegrin, l sporc desvaliva possiblitèdes per chi che ge pièsc l paslonch te n ambient che tol l fià e che l ge somea a chi lesc del nord de la Scandinavia. L batiportoes Michele Defrancesco e l maester de schi Andrea Desilvestro i conta de la natura e di portoes e ence de vèlch aspet particolèr del lech.