I argomenc de chesta setemèna l é:
L projet del Comun General de Fascia “A-Majon” l va inant e ades l se à endrezà ence co na Gift Card. Chesta la neva prejentèda instadì per didèr l’economia locala e fèr a na maniera che la jent del post la posse jir a comprèr e s’emprevaler di servijes te la val.
L coro Enrosadira l à portà dant n conzert da Nadèl dut particolèr. Nia più na rassegna con etres cores, ma piutost n moment dedicà a la comunanza de Moena de gra ence al didament di bec de la Pruma comunion. Na maniera per descorir i leames sozièi e fèr crescer la colaborazion.
L temp de Nadèl sessaben l é temp de festes, momenc per stèr adum, se magnèr na speisa en familia o en compagnia e apede se beiver ence zeche de bon. Col didament de Roberto Anesi, mior sommelier del 2017, porton dant la carateristiches e la calitèdes de desvalives vins.
I report de chesta setemèna, enjigné da Riccardo Zanoner, Angela Pederiva e Sabrina Riz, i vegn porté dant da la ousc de Riccardo Zanoner.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol,
“Pedies” l va fora su Trentino Tv vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
opuramenter se pel veder i servijes un a un su la piata Facebook de TV Ladina.
