Traduzione in ladino

“Pedies”: l é fora la puntata #462 del program ladin per la televijion

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata 462.
I argomenc de chesta setemèna l é: la Gran Radunanza de la Majon di Fascegn, n moment per portèr dant la ativitèdes del Istitut, del Museo e de la Biblioteca ladina, ma ence n moment de confront e de barat de idees. Endèna la scontrèda l é stat anunzià ence l 50^ cedean de la Majon di Fascegn, che la é do a se endrezèr per fèr festa per chest gran travert tel 2025; i Conscric l é na tradizion n muie sentuda dai joegn che fèsc i 18 egn. Per chest l’Union di Ladins de Fascia, tel chèder di projec del Pian di Joegn de Raion – La Risola, l’à metù a jir n cors gustegol per ge ensegnèr ai tousc apede ai 18 egn co se endrezèr l gramièl e l ciapel da Conscrit; per la rubrica “Lesc: cuchèr te ogne piz e cianton”; Ve porton ta Penìa, ultim paisc de la Val, logà su na barconèda de pre erc, tedant da la crepes de la Marmolèda. N paisc n mingol foravia, con n muie de curiositèdes artistiches, storiches e culturèles.
Amò apede recordon che en lunesc ai 9 de dezember del 2024 da mesa les nef da sera te Ciasa de la Moniaria a Sèn Jan vegn portà dant l codejel “ENTENER E SE FÈR ENTENER: JIR A PROVEDER, COJINÈR E MAGNÈR A NA VIDA ECOSOSTEGNIBOLA E SÈNA”, scrit da Doris Valentini. Per la prejentazion vegn endrezà doi corsc de cojina col chech Andrea Zanoner aló dal Hotel l’Ideale a Moena, en mercol ai 11 e en lunesc ai 16 de dezember. Per informazions se oujer al Ofize di Servijes linguistics e culturèi del Comun General de Fascia a la direzion mail cultura@cgf.tn.it.