Traduzione in ladino

“Pedies”: l é fora la puntata #461 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata 461. I argomenc de chesta setemèna l é: l projet Troupes, endrezà da la sociazion Inout, ti dis passé l é ruà fin te la Sardegna per tor pèrt al event “Davegnir impari” che à metù ensema fascegn e sardi per n moment de confront sul davegnir de la mendranzes; l é stat ence prejentà l ejit del projet: doi curc filmac “Al dì de doman” e “La gran lavada”, che i vegn porté dant ence te Fascia en domenia ai 24 de november da les 5 domesdì te Istitut cultural ladin; a 15 egn da la desgrazia de la Val Lasties, l Socors da mont de Fascia à metù ensema n calandèr per recordèr Alessandro, Diego, Erwin e Luca, morc per portèr aiut; chest projet no l se ferma demò al recort, ma l conta del sentiment che lea l viver del om sa mont, con sie teritorie e sie ambient; i Servijes linguistics e culturèi del Comun General de Fascia dessema coi comedianc de Fascia endreza la 3° Rassegna de teater ladin! La rassegna la scomenza ai 30 de november e la va inant fin ai 4 de mèrz, la tol ite 6 gropes de teater che portarà dant 15 apuntamenc con comedies, spetacoi e mascherèdes; endèna la rassegna vegnarà recordà Vigilio Iori rechia, om che se à dat ju n muie per l teater! “Stroria de amor e fadie” l codejel che conta la vita de Isabella Iellici, cresciuda coi giaves sun Penìa, na picola vila fora da Moena, dalonc da la mère che la lurèa demez; na biografia testimonianza de n picol mond anchecondì dut mudà, con n fort messaje de emanzipazion de la femenes.