Patagonia 1976 – N docufilm che porta dant la spedizion te la Patagonia del 1976 di Ciamorces e di menacrepes de Fascia. L filmat l é stat metù ensema de gra al material de Almo Giambisi che, con sia intervista e cheles de sie compagnes Alfredo Weiss, Carlo Platter, Ettore Rasom, Gino Battisti, Ivo Nemela e Lodovico Vaia, l conta la aventures de inlouta te l’America del sud per arjonjer l piz del Cerro Egger. La prejentazion la é stata fata aló dal chino de Cianacei en vender ai 14 de november olache à tout pèrt n muion de jent da duta Fascia.
La sentèda del Consei general del Comun General de Fascia fata ai 13 de november olache l é stat lità i mudamenc al Statut e l Pian organich de politica linguistica per l 2026. Per chest report l Procurador Edoardo Felicetti l ne met dant più avisa i aspec tecnics di mudamenc del Statut. Per l Pian organich enveze, che ence chest an l preveit n stanziament de passa 500.000 euro l Conseier de Procura Bernardino Chiocchetti l ne conta zeche più avisa de chel che vegn fat e vegn pervedù de fèr per la cultura, l’identità e l lengaz ladin.
La onoranza endrezèda da la Majon di Fascegn sot l titol “Caterina De Cia Bellati Canal” dedichèda a la enrescida e a la produzion scientifica per valorisèr la spezifizitèdes antropologiches, culturèles e linguistiches del raion de la Èlpes. Per chesta edizion metuda a jir per la pruma outa te Fascia à tout pèrt 15 partezipanc con 9 teses e 6 publicazions de aut livel che les va da la linguistica, a l’economia, a l’antropologia, a la conties. Tinultima l é stat declarà 3 venjidores a chi che che ge é stat dat pest de 6.000 euro.
Per la rubrica “Piates: Chel liber sun scancìa”: la Maria Piccolin da Moena, che per n muie de egn l’à ret la biblioteca de paisc, la ne conta de n liber che l trata de l’autonomia de noscia Region dal titol: STORIA DELL’ASAR. N test scrit da Lorenzo Baratter olache vegn contà de chesta sociazion per i studies de l’autonomia regionèla che l’à abù n gran ejit sobito do la 2^ vera dal 1945 al 1948. N moviment che l era ruà a tor su passa 100.000 jent e che l à didà meter ju i fondamenc de l’autonomia che aon ence amò anchecondì.
I reports de chesta setemèna i é stac enjigné e porté dant da Riccardo Zanoner e Angela Pederiva.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program ades l va fora ence sun AltoAdige TV – canal 11 de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
opuramenter se pel veder i servijes un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
