Ai 16 de firé l é Sènt’Ugèna patrona de Fascia, sègra de val. Na bela procescion con autorità e jent da vigni paisc la é ruada fin sun Ciaslir per la messa grana e la benediscion. La sègra la é jita inant co la musega de Vich e con grostoi e zeche de ciaut da beiver per duc chenc.
L carnascèl de Ciampedel l à metù a jir i jeghes olimpics Milan-Ciampedel 2026. Gropes con cères, massaries e gran fantasia, duc con sia bela facera, se à endrezà a portèr dant desvalives sport, ence descognosciui, anter matitèdes e sgherc. L event l é stat inaudà da Bezuch portachentl che à empeà l brajei olimpich col inn ladin anter n grumon de jent e à avert la defilèda le gran mèscres del carnascèl fascian.
Ai 21 de firé, l é la Dì internazionala del lengaz de la mare declarèda del ‘99 da l’UNESCO per recordèr l’emportanza de la biodesvalivanza linguistica, con duc i passa 7.000 lengac rejoné tel mond. Te chesta ocajion i Servijes linguistics e culturèi del Comun General de Fascia met a jir l projet “Ladin, n lengaz da amèr”, ruà a la quarta edizion, olache chest’outa i à domanà la colaborazion di atlec de Fascia che à tout pèrt ai jeghes olimpics da d’invern e i à portà la bandiera ladina tel mond per uzèr fora la beleza de nosc lengaz ladin col slogan: Nosc lengaz conta ence de te: recorda, rencura, rejona.
L Picol Prinz: na neva publicazion data fora per endrez de l’Union di Ladins de Fascia co la traduzion a cura de Stefen Dell’Antonio Monech. Chest liber, cognosciù te dut l mond e traslatà jà te passa 600 lengac, ades l à ence so verscion per ladin fascian, che ge é stata dedicada al prof. Vigile Iori rechia.
I reports de chesta setemèna i é stac enjigné e porté dant da Angela Pederiva e Riccardo Zanoner.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program ades l va fora ence sun AltoAdige TV – canal 11 de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
opuramenter se pel veder i servijes un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
