Manà fora su Trentino Tv l program l vegn endrezà dal Comun General de Fascia

“Pedies”: en sabeda ai 10 de jené vegn fora la puntata #520 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 520. I argomenc che vegn portà dant te la puntata de chesta setemèna l é:
L Comun de Ciampedel, de gra ence a la colaborazion coi comuns de Mazin e Cianacei e i finanziamenc del PNRR e de la Provinzia, l é ruà a piz coi lurieres per la neva coa di picioi. Do la bona responeta che à abù l servije soracomunèl per i fantolins de Fascia, avert de otober del 2023 a Soraga, ence la val de sora la met a jir chest servije trop spetà da la families.
L comun de Moena à endrezà ence chest an n conzert per festejèr l an nef e sporjer sie augures a la comunanza e i ghesć. Per l ocajion l é stat chiamà l’orchesta Aurona, reta dal maester nasciù a Moena Claudio Vadagnini, che l à portà dant sie repertorie musical che lea ensema tradizion e inovazion, e ence l mond ladin, co la museghes Aneta e Conturina.
Sot la festes la bela vila de Vich se à viventà col prejepie animà endò endrezà do egn che no l vegnia più fat. Defat trei volontadive de paisc se à pissà de tor endò fora de crigna l copion de chesta scomenzadiva rica de tradizion e sentiment e, dessema col comitat manifestazions Vich events, i à metù ensema 50 feguranc e volontadives che à spilenà, moscià i lurieres e tradizions de n’outa, ciantà, sonà e fat cercèr douces de noscia tradizion.
Forin Fiem l é stat l tour de ski, garejède de pas lonch ruà a la 20 eisema edizion. Prumes, jà stac ence ti egn passé, l norvegeis Klaebo e la merichèna Diggins, Caterina Ganza da Moena 17eisema. Desche de zenza n bel spetacol, dut l è jit delvers e l endrez l é stat ezelent, na bela proa envers le Olimpiades che les scomenzarà te n meis.