Manà fora su Trentino Tv l program l vegn endrezà dal Comun General de Fascia

“Pedies”: en sabeda 1m de november vegn fora la puntata #510 del program ladin per la televijion

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 510. I argomenc che vegn portà dant te la puntata de chesta setemèna l é:
Te Palaz de la Region a Trent ge é stat dedicà na esposizion al artist fascian Virgilio Sorapera de la Zoch a 10 egn da sia mort. Virgilio l é stat n artist che l à sapù leèr èrt e sentiment identitèr, col contèr de nosc raion da mont e de la jent de Fascia.
L Cor Valfassa à portà dant “Ciantèr sa mont” la 20eisema rassegna de cores a chela che l à envià ence l cor Laudamus, da Nerviano apede Milan e l cor Castel Penede da Nago-Torbole. L Cor Valfassa, metù sù acà 55 egn, anter storics e neves, l é metù ensema da 35 ciantores, e l vèrda inant con voa de se miorèr e crescer.
La Sociazion “Sul fronte dei ricordi” e sie President Livio Defrancesco col didament de la storica Maria Picolin, l’à portà dant n liber nef che l conta de Sèn Pelegrin e de sia storia. “Passo San Pellegrino nelle Dolomiti: teatro di incontri e guerra” l porta dant devalives aspec leé a la storia, vita da zacan e confins, con ence de bela foto mai publicade dant.
I servijes linguistics e culturèi del Comun General de Fascia e MarameoLab à endrezà la 4a edizion de Berlichete, n laboratorie creatif per bec per sensibilisèr la doura del lengaz de mendranza e per l’inclujion linguistica. Vigni edizion la é desvaliva, chest’outa se à rejonà de musega e de respet del ambient.