Stèr ben con se enstesc per poder stèr ben ence coi etres. Chest l é stat l argoment zentrèl de “Kino vel stèr ben”, la scontrèda endrezèda en vender ai 23 de otober al Kino Marmolèda da la sociazions Inout, ACAT e belimpont Kino.
N prum apuntament per portèr dant l lurier de chisc gropes che l é te val e descorir che l é sacotanta strèdes che pel portèr al bonstèr. L é stat n muie de jent che à tout pèrt e che à portà dant ence ejempies e testimonianzes personèles, dal sport, al valor de la natura, a l’alimentazion e a chel che ence i servijes sozièi te val i pel fèr. "Ogneun à sia debolezes ma col didament de la comunanza e de chi che stèsc apede se pel se didèr fora", l é stat dit.
Sèn Martin de Tor l é n picol paisc logà a mez la Val Badia. Anchecondì l se tol fora dai lesc più de nonzech de la val dal pont de veduda turistich, ma te la storia l aea na posizion strategica de gran valuta e chiò, tel Ciastel de Tor, aea sia senta l Capitan o Vicare nominà diretamenter dal Prinz Vescof de Persenon. Chest frabicat l é n muie antich e l é ence n muie enteressant dal pont de veduda architetonich con n stil nobilièr, dalonc da la cèses da bacan de la jent. Te chesta puntata ve conton de la storia del ciastel e de coche l é doventà anchecondì l Museo de duc i ladins dla Dolomites.
Te la rubrica “Svampol ciatarul: jent che fèsc jerveèr sie cunst”, porton dant Silvano Ghetta da Vich, n bravo artejan che da la mautes del murador l é passà a la scedoles del legn. Sia creazions les tol l eie da tant curiouses che les é ajache vindedò l é semper na idea foradeanter. Per si lurieres l doura n muie roba veia, ciodi de traves, feres de ciaval o èrc de armadures, sasc e autra robes amò. L ciapa te man si legnes e con piona, bindela, zircolare e diaolet l laora fora sagomes, chèdres, cornisc, lum, scagnie, dut aldò aldò del estro e de chel che l vel fèr. L’ispirazion la ge vegn da la natura e dai monc ma tel medemo temp l tol su ence chel che ge pièsc a la la jent. Na persona de gran estro e fantasia che la fèsc lurieres de legn artistics che soscedea semper na gran curiousità.
I reports de chesta setemèna i é stac enjigné e porté dant da Annarita Lollo, Riccardo Zanoner e Angela Pederiva.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
