En sabeda passèda, sot na bela fiochèda, l é stat fat gran Festa a Vich olache duta Fascia l’à volù ge sporjer so detelpai a Chiara Mazzel; la campiona paralimpica de schi che te chisc ultimes Jeghes Paralimpics la é stata bona de se venjer 4 medaes: 1 de or e 3 de arjent. Chiara la é stata portèda en caroza fora per paisc enfin te piaza de paisc olache la autoritèdes de la val e de la Provinzia, les ge à sport i rengraziamenc più sentui per si resultac arjonc sessaben con fadia, empegn e dedizion. Amò apede sie amisc i ge à dedicà na ciantia aposta en so onor.
Publicazions, programes radio e filmac, corsc per la jent, raides, la Festa del Rengraziament e trop auter; chesta la tematiches portèdes dant instadì da pèrt de la Union di Ladins de Fascia en ocajion de sia Radunanza Generèla tegnuda instadì aló dal Hotel Rizzi de Salin a Pera. Na scontrèda per rejonèr di lurieres fac via per l an passà ma tel medemo temp ence per portèr dant l program de chest an. L é stat recordà ence l’emportanza del Grop Ladin da Moena, editor del boletin “Nosha Jent” e de l’interladinità. Per l’ocajion l é stat prejentà l liber “Nosta Speisa” co la prejenza de l’autora Anneliese Paratoni.
I studenc de la Scola Ladina de Fascia, en colaborazion col Liceo Ulisse Dini de Pisa, i à endrezà na mostra-laboratorie dal titol JOCALO. L é na scomenzadiva dassen cuoriousa e enteressanta ajache l obietif l é chel de meter al luster e fèr entener al publich, très desvalives jeghes e performances di jocolieres, la regoles che les stèsc tedò i prinzipies scientifiches e de la fisica. L é stat metù ju desvalives stonc olache vegn desmostrà e spiegà chel che l é tedò peisc che se balanzea enstesc, n oget che l passa da n post al auter, ciapie o cheilesc che i outa per aria. La mostra la restarà averta aló dal Liceo artistich de Sèn Jan enfin a en mercol 1m de oril.
Te anter i desvalives atlec fascegn l é ence n joen che se dèsc ju col triathlon da d’invern: più avisa Jacopo Fanton da Poza. Chesta sort de competizion la perveit apontin 3 sport da fèr dessema: corsa, roda da mont su la neif e schi de paslonch. Jacopo l an passà l à venciù i campionac juniores taliegn e ence i campionac mondièi. De bie resultac donca che ge à dat gaissa e sodisfazion. Co la redazion de Pedies sion jic a l troèr per se fèr contèr de chesta sia pascion, de coche la é stata che l se à arvejinà a chesta sort de competizions e de coche l se arcedea.
I reports de chesta setemèna i é stac enjigné e porté dant da Riccardo Zanoner e Angela Pederiva.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link: https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
