L era apontin acà 130 egn, tel meis de firé del 1896 canche per voler de 100 paesegn che l é doventà i prumes 100 sozi l é stat metù su la Coprativa de Sèn Jan. L contest economich enlouta l era dassen rie e l’idea de la coprativa l’era apontin chela de endrezèr n didmaent concret per duta la comunanza, a na moda da poder ge fèr front a la dificoltèdes de vigni dì. Per recordèr chest cedean la coprativa Fassa Coop de anchecondì la ne sporjarà n viac tel temp, anter stories, recorc, oujes e foto en bianch e fosch, per tegnir su na pèrt de noscia identità e ge la sporjer a la neva generazions.
Fiat Lux l é l titol del event portà dant tel chèder de la scomenzadives di jeghes olimpics. N spetacol foradeanter che l met ensema musega, bal, lumes e raes laser, per fèr viver na esperienza multisensorièla, che ciapa ite l spetador e l lo fèsc ruèr te n mond da marevea. N viac olache la notes à na forma e n color, e les soscedea de gran emozions. Dut chest l é stat portà dant de gra al lurier de La Scola de musega il Pentagramma de Fascia e Fiem con sie diretor Roberto Silvagni, dessema co la scola de bal de Tieser, l tecnich de sons e lums Marco Mattia, col didament del comun de Pardac e APT de Fiem.
Chisc dis passé, più avisa ai 24 de firé, aló dal Palaz de la Region a Trent l é stat metù a jir l prum Dì regionèl de la Mendranzes Linguistiches olache l é stat chiamà sun paladina i raprejentanc de la mendranzes ladina, mochena e zimbra te la persones di diretores di Istituc culturai. Na scomenzadiva voluda dal Ass. Regionèl Luca Guglielmi no tant per se lodèr enstesc ma per vardèr al davegnir co na coscienza identitèra, linguistica e culturèla più forta e madura. L é stat portà dant desvalives momenc de confront e discuscion anter i istituc culturèi, la istituzions e ence con sportives de mendranza. L é stat sotrissà l’emportanza de seghitèr a tegnir su cultura e lengaz a livel local ma ence de se vardèr foravia per colaborèr e troèr neves troes per portèr semper più in aut noscia trei mendranzes.
I reports de chesta setemèna i é stac enjigné e porté dant da Angela Pederiva e Riccardo Zanoner.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence sun AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
