Ti ultimes egn la costion pruma cèsa l é doventà na problematica de gran atualità te Fascia. Via per l meis de oril l Comun General l à metù a jir na enrescida online per binèr a una desvalives dac e poder tratèr più avisa i aspec de coche la é coi besegnes de la cèsa. Enfin ades à dat ju sia respostes 250 persones e l é vegnù fora desvalives elemenc, informazions e besegnes. L Procurador l porta dant i prumes ejic de la enrescida, l fèsc vèlch valutazion su co tor te man l problem e co poder entervgnir al miec ence dessema coi ombolc de la val.
“C’era una volta un bullo” l é l titol del spetacol metù a jir da la scola ladina de Fascia col fin de sensibilisèr en cont de bulism e cyberbulism. L é l frut de n projet scomenzà chest’uton per endrez del Sorastant Federico Corradini e de la Comiscion contra l bulism de la scola. Per la raprejentazion à tout pèrt 120 bec e joegn de vigni età, con apede ence genitores e maestres, e col didament de la maestra de teater Michela Marangoni. L bulism l é na costion delicata e no l é semper sorì la tor te man nience da pèrt de la jent grana. Tinultima l é ruà n messaje fort al publich che l à soscedà emozions dassen fones.
La toponomastica la raprejenta n patrimonie de cultura, storia e testimonianzes che l à da esser stravardà e valorisà. Per chesta rejons l é un di argomenc che da semper à più a cher l'Union di Ladins de Fascia e per valorisèr chesta gran richeza l’à lurà fora e publicà sui social 30 chèrtes con 750 toponimes ti paijes e di lesc dintornvia.
Da chest lurier l é vegnù fora ence vèlch proponeta per miorèr i strumenc informatics che sessaben i pel sporjer n gran aiut e apede i pel didèr ence a meter a jir neves studies e enrescides a pontèr via belapontin dai inomes di lesc desvalives.
“Rosengartenbus” l é l inom che ge é stat dat al projet de la sociazion Transdolomites out a la mobilità che apede l viajer, la met enlongia ence cultura, storia e autra nozions e informazions. L é na neva proponeta metuda a jir su la streca 180 de la corirera che da Busan la vegn te Fascia. L é la pruma scomenzadiva de chesta sort che la vegn sperimentèda te la Tèlia e se spera che la vegne touta sù con gaissa ence dai ghesć. Instadì la é stata portèda dant ai scolées de la terzes populères de Poza e Vich col didament del Museo ladin de Fascia, del Museo geologich de Pardac e ence di giaves che, per chesta ocajion, i ge à conta a chi che à tout pèrt si recorc de la vita da zacan.
I reports de chesta setemèna i é stac enjigné e porté dant da Riccardo Zanoner, Angela Pederiva e Evelyn Bortolotti.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
