En mèrtesc ai 28 de oril l é stat chiamà ite l Consei General del Comun General de Fascia. L orden del dì l pervedea 8 ponc con te anter l rendicont general del 2025. La Conseiera de Procura Lara Battisti l’à spiegà bel avisa la oujes de entrèda e sortida e l desavanz final. L é stat rejonà de 2 mozions portèdes dant dal Grop Neva UAL aproèdes da duc i conseieres. L Procurador l à metù enconsaputa l Consei de la nomina con enciaria a 2 conseieres respetivamenter per la costion mobilità e la pruma cèsa e amò apede l à fat a saer de coche la é la situazion coi projec per la caserma Vittorio Veneto.
Ence chest an col meis de mé e l scomenz de la bona sajon vegn metù a jir la “Aisciuda Ladina”; l event endrezà dal Comun General dessema col Istitut Cultural “Majon di Fascegn”, La scola de Fascia e la Union di Ladins dedicà a noscia val e a nosc lengaz. L’argoment l é amò chel de la toponomastica co l’intenzion de jir inant a descorir, cognoscer e recordèr i inomes di lesc, testamonesc veiores de storia e comunanza. L program l é desche zenza belebon rich e per ogne gust: l perveit raides fora per la val, scontrèdes culturèles, prejentazions de libres e auter amò dut per stèr adum e se goder dessema.
Per la rubrica de aprofondiment “Svampol ciatarul: jent che fèsc jerveèr sie cunst”: chest’outa co la redazion de Pedies porton dant
Giordano Costa – de Gustele de Tita de Mènia.
Giodi coche l é cognosciù te duta Fascia l à na gran pascion per la musica: l sona la steirische (la diatonica), l cianta cianties de ogne sort e l fèsc zeche jodler da marevea. Te chesta puntata l ne contarà de coche l é nasciù so amor per l orghin da mantech e de coche ge sa bel stèr te anter la jent, trasmeter, très sia sonèdes, la forza de la tradizion, de la musica folk, de la cultura popolèra con cianties zaches e curiouses che conta di lesc e de la vita da chiò dintorn.
I reports de chesta setemèna i é stac enjigné e porté dant da Riccardo Zanoner e Angela Pederiva.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina: https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
