Coche se sà la costion cèsa te Fascia la é belebon ria: l é n problema che tocia soraldut i joegn, singoi o cobies, e chi che vegn a lurèr da foradecà e che i volessa se enciasèr chiò. L Comun General en colaborazion co la fondazion “Trentino Abitare”, l vel sporjer n didament col troèr neves cartieres a fit e i meter a la leta de chi che à besegn. A chest propojit vegn pervedù ence n ofize de informazions che l sarà a la leta te Fascia ogne 3° vender del meis, a Sèn Jan aló da la senta del ANFFAS.
La Gran Festa d’Istà a Cianacei l é doventà n apuntament per duc i ladins del Sela e chest an, belimpont 80 egn dò da la gran radunanza del Sela, stata de messèl del 1946, l comitat de endrez l à volù ge la dedichèr a chel event. Via per d’aisciuda l é stat metù a jir na meisa torona dintornvia chest argoment e ades per la festa l é stat portà dant na sonèda duta neva dal titol “Ladins del Sela”. Per l’ocajion ence i raprejentanc istituzionèi i à recordà la costion ladina e l’emportanza de tegnir sù emportèr inant l lengaz, la cultura e l’identità desche un soul popul.
Ence per la maestra Margherita l é ruà l moment de la pension e la comunanza de Soraga la ge à fat na bela festa. L era l an 1987 canche l’à scomenzà so percors de scolina e te duc chisc egn l’à vedù passèr dedant n muion de bec de più generazions. Per l’ocajion l é stat portà dant rimes, matitèdes e cianties endrezèdes dal grop di joegn a chi che se ge à jontà apede ence la jent del paisc.
Dai 2 ai 4 de otober a Ortijei, a Cianacei e a la Ila, l’Union Generèla di Ladins dla Dolomites la metarà a jir l Ladiniatour, più avisa la rassegna de conzerc dediché a la musega moderna ladina. Per chest termin desvalives musizisć ladins i portarà sun paladina cianties neves, toc enjigné aposta per l’ocajion e per viventèr l lengaz de la mère. La redazion de Pedies la prejenta dantfora a si spetadores i desvalives gropes, i ciantarins e la ciantarines de la trei valèdes ladines che tolarà pèrt a chesta neva edizion. Te chesta puntata jon a cognoscer l grop: “JULIAN & THE D-STREET BAND”.
I reports de chesta setemèna i é stac enjigné e porté dant da Riccardo Zanoner e Angela Pederiva.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
