Venerdì, 13 Novembre 2026 - 13:12 Comunicato 3437

Manà fora su Trentino Tv l program l vegn endrezà dal Comun General de Fascia
“Pedies”: con en sabeda ai 14 de november vegn fora la puntata #563 del program ladin per la televijion

Traduzione in ladino

[Ladino] Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 563. I argomenc de chesta puntata l é: n convegn per rejonèr de mendranzes e autonomia. Esperc e autoritèdes se à binà a Trent tel chèder de la scomenzadives per i 80 egn de la cordanza Degasperi - Gruber; l conzert finèl del projet “TrasLaMusega – Ciantèr Fascian”, de la Majon di Fascegn; per l invern che vegn Comun General e APT i metarà a jir n servije de mobilità debant per duta la jent enciasèda te Fascia; l ladin l passa al prum post: pea via l renovament de la tabeles de la strèdes
[ Comun general de Fascia]

A Trent l é stat endrezà n convegn dedicà a la mendranzes linguistiches e a l’autonomia, portà dant tel ambit de la zelebrazions per i 80 egn de la cordanza De Gasperi-Gruber. Endèna la scontrèda esperc e raprejentanc istituzionèi à sotrissà l’emportanza de stravardèr no demò i deric linguistics, ma ence la possiboltà per la comunanzes de tegnir viva sia identità, sia cultura e sia prejenza sul teritorie. Anter i argomenc ence l’esperienza ladina, la dificoltèdes leèdes al smendrament demografich e l problem del azes a la cèsa. L Comun General à sotrissà ence l besegn de renforzèr i strumenc de autonomia e ge fèr front a la endesfides sozioeconomiches e ge arsegurèr n davegnir a la comunanza. Lèrga ence a l’esperienza de la mendranza Sorba te la Germania e a la desvaliva situazions de la mendranzes del Trentin.

Ai 8 de november, te Teater Navalge de Moena, l é stat l conzert finèl del projet “TrasLaMusega – Ciantèr Fascian”, de la Majon di Fascegn, che à tout ite più che 200 ciantores de set cores de Fascia. La scomenzadiva, nasciuda per valorisèr l lengaz ladin tra la musega, l’à portà a la creazion de neva cianzons per ladin, de gra a la colaborazion de cores de età e tradizions desvalives. N projet che lea adum generazions e sensiboltà musicales e che à metù su n repertorie nef che vegnarà metù a la leta sul portal del Istitut. Na ocajion per ciantèr dessema e tegnir su l lengaz e l’identità culturèla.

A scomenzèr co la sajon da d’invern 2026/27, l servije Skibus l sarà debant per duc i residenc de Fascia. La scomenzadiva, portèda dant enstadì en conferenza stampa dal Comun General e da l’APT, la vel smendrèr l trafich su la strèdes, miorèr la calità de la vita e ge dèr de retorn a la comunanza na pèrt di benefizies che vegn ca dal turism. L Servije l é endrezà sun 13 linees, con 30 mesi e zirca 30 passaje per ogne paisc. Per poder se emprevaler del servije ge vel aer la tessera personèla debant, che se pel ciapèr ti ofizies APT moscian n document de recognosciment. L servije l pearà via coi prumes de dezember enscin la festes de Pèsca.

La Comiscion toponomastica ladina va inant con sie lurier de valorisazion del lengaz e del teritorie tras la tabeles e i segnèi de la strèda. La neva prinzipèla l é che sui segnèi vegnarà metù dant l inom ladin e dapò chel talian, semper co la medema dimenscions. Ta Cianacei l lurier l é jà pontà via co la pruma tabeles neves aló dal rondel tinsom Pian de Pareda. N projet che tolarà ite mingol a la outa ence i etres Comuns, i troes da mont e i segnèi turistics, de gra a la colaborazion con sociazions e realtèdes del post. Na scomenzadiva concreta per stravardèr l’identià ladina e fèr acioche l lengaz l sie semper più visibol te la vita de duc i dis.

I reports de chesta setemèna i é stac enjigné e porté dant da Annarita Lollo, Riccardo Zanoner e Angela Pederiva.

Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).

L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).

Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina

La puntata de chesta setemèna la vegnarà fora entorn la medema ora de la televijion.

Se pel veder i report un a un su la piata Facebook de TV Ladina.
https://www.facebook.com/TelevijionLadina

Traduzion di Servijes Linguistics e Culturèi del Comun general de Fascia

(cdt)


Immagini