Via per chisc ultimes meisc per endrez del Procurador Edoardo Felicetti, l Comun General de fascia l é ruà a portèr a compiment na proponeta de gran valuta: chela de poder endrezèr l servije di apalc per cont di comuns très l strument de la delega. Anchecondì fèr lurieres publics l è semper più complicà pervia de la normatives e di vincoi. Con chest servije l’idea l è chela de didèr i comuns a gestir la burocrazia, i adempimenc aministratives, i finanziamenc e dut chel che ge vegn aldò a na vida più sorida. Te na conferenza stampa l Procurador dessema col ombolt de Ciampedel e responsabol de ofizel tecnich i à metù dant coche vegnissa endrezà chest nef servije che l raprejenta ence n esperiiment a livel provinzièl.
Trei dis zenza tor te man l fonin, zenza manèr messajes e publichèr foti sui social. Chesta l è stat la scomenzadiva metuda a jir te Contrin per endrez de l’APT de Fascia sot l titol “Digital Detox”. Na esperienza a chela che à tout pèrt diesc giornalisć che, sot la vida del dozent Alessio Carciofi e de l’esperta Katiuscia Rasom, i à usà via l cef a se destachèr dai aparac digitèi, con spazirèdes, meditazion e ejercizies desvalives, anter chisc ence l bagn de bosch. Se destachèr donca da la tecnologia che ne compagna duc i dis, emparèr a se raportèr co la natura, valorisèr la meditazion, scutèr l corp e si sensc per jir a descorir n raport più fon con se enstesc.
En mèrtesc ai 9 de jugn l é stat chiamà ite l Consei General del Comun General de Fascia. Te anter i ponc al orden del dì l era la sostituzion del Conseier Samuel Lazzer col nef conseier Armando Mich, i mudamenc al bilanz 2026 e doi interogazions da pèrt de la Conseiera de mendranza Mirella Florian en cont de na governance unica per Fascia e l projet de la Caserma Vittorio Veneto. L Procurador l à dit de no esser a una col perveder un comun unich ma n sistem de colaborazion anter i enc e per la caserma l à fat a saer che i cosć i massa auc per l Comun General. Per i mudamenc al bilanz l é stat metù maor ressorses per l pian de comunità.
Anter i 29 de mé e i 2 de jugn, l Cor Enrosadira l é jit te la Sardegna per meter a jir na fradaa coi cores Monteferru e Terra Mea. Na scomenzadiva de barat anter mendranzes linguistiches, ladins e sardi, a chela che à tout pèrt ence desvalives raprejentanc istituzionèi. L è stat endrezà n program fit e toch olache l Cor Enrosadira à podù ciantèr per ladin te anter i nuraghi e desvaliva gejies. Ensema coi etres cores, l é stat portà dant cianties tradizionèles de la doi mendranzes, che conta de la jent e de sia tera. Na fradaa che no la se ferma chiò ajache via per de setember i cores sardi i vegnarà a Moena per tor pèrt al festival del puzzone.
I reports de chesta setemèna i é stac enjigné e porté dant da Riccardo Zanoner, Evelyn Bortolotti e Doris Valentini.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN - vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
