Te l’Istria vif na popolazion recognosciuda desche mendranza linguistica che à deric particolères per l stravardament de sie lengaz e cultura. Con chela de envièr via n barat de esperienzes e de informazions ence coi raprejentanc de la mendranzes del Trentin e per sotrissèr l leam de na comunanza con sie teritorie, l Servije Mendranzes Linguistiches à envià na delegazion de l’Istria a na scontrèda stata enstadì a Trent. Per raprejentèr Fascia à tout pèrt l Istitut Cultural Ladin e l Conseier de Procura con delega a la cultura del CGF Bernardino Chiocchetti.
La banda de Moena, en ocajion de la zelebrazions per sie Sènt Patron, Sèn Vile, à endrezà l Prum Dolomites Music Festival, na festa per la comunanza olache no g’é stat fat onor demò a la musega, ma l é stat valorisà ence l sport con na festa per i atlec mondièi fascegn, per l 80m cedean de la sociazion Monti Pallidi e l Sorì event. A ge fèr da cornisc ai evenc, l é stat endrezà “Musega en moviment” olache no podea mencèr musega e coreografia.
Te la mont de Poza, con chela de ge dèr n nef sbunf al bosch che à padì a cajon de Vaia e del becherle, l grop Festa ta Mont, en colaborazion co la frazion de Poza, i forestèi e Elel à endrezà “Piantar Piantins”, n dadoman fora de anter olache la jent la é stata envièda a piantèr piantins neves per n bosch più san e ciatarul.
Per la rubrica “PIATES: chel liber sun scancia” olache conton de libres e publicazions per cognoscer argomenc curiousc, Maria Piccolin, che la é stata bibliotecaria de Moena, la ne rejona de “La Veisc conta”, n liber scrit dai bec de la populères de Moena tel an de scola 2004/2005 olache la Veisc ne porta dant conties da zacan e da anchecondì.
I reports de chesta setemèna i é stac enjigné e porté dant da Riccardo Zanoner, Angela Pederiva e Doris Valentini.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” va fora su Trentino Tv – canal 10 Prov. de TN - vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program l va fora ence su AltoAdige TV – canal 11 Prov. de BZ - vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia
