L prozess per la pianificazion del nef ospedèl l é pontà via col tor ite i teritories enteressé tras n percors partezipatif – fat anter november del 2024 e firé del 2025 – out a tor su la spetadives e i elemenc per la localisazion.
L sistem tout su, sotrissea Gottardi, l à sie focus tel conzet de “sanità zircolara” (che tegn en conscidrazion duc i aspec coleé e l é stat ence l focus de dut l prozes de pianificazion tout ite ence la fasa partezipativa) e coscita l é stat troà fora strategies e 32 criteries localisatives (de idonetià, de endrez e de program) che i tol su te la pratega i ejic del prozess partezipatif. Se trata donca de n sistem che ge permet al teritorie de troèr fora la localisazion più adatèda, de gra al muion de dac, analises e elaborazions luré fora, e l é na sperimentazion che sarà per l davegnir de la pianificazion trentina pojèda su valores e obietives, no soraldut conformatives descheche l é ades.
L valor de la localisazion de mascima, peissa l assessor, se concretisea donca te l ge sporjer a la Comunità de Fiem n sistem che posse troèr n balanzament dret anter la dimenscion del frabicat del ospedèl e la dimenscion del teritorie, col tegnir en conscidrazion desvalives aspec, da chi sanitères, a chi sozio-economics, infrastruturèi, urbanistics, paesajistics e ambientèi. “Per cerner la localisazion finèla – disc tinultima l assessor – se cognarà tegnir en consciderazion ence la relazion con la jent del post e con i desvalives sogec che vegnarà tout ite per devaliva rejons. Per chest no l é assà n projet, de localisazion e dapò de frabica, ma ge vel n “pat” respet a chel che l pian teritorièl de la comunità l é na cornisc teritorièla”.
L iter ades l va inant con la fasa de depojit al publich per la osservazions e i adempimenc pervedui da la normativa su la valutazion ambientèla strategica, con l obietif de ruèr te curt temp al secont passaje te Jonta provinzièla per l’aproazion de la localisazion de mascima.
La documentazion le ge vegnarà donca manèda ite a la Comunità de Fiem per envièr via l’ultima fasa, chela de la localisazion definitiva del nef ospedèl, do da chela che se podarà envièr via la fasa operativa, con la projetazion e la realisazion de la neva infrastrutura sanitèra.
Traduzion di Servijes Linguistics e Culturèi del Comun general de Fascia
