Do 14 egn dal prum switch off – del 2009 l é stat la fin de la televijion analogica che la ge à lascià l post al segnal digitèl -, la televijion digitèla la se enjigna a n nef mudament, l’adozion definitiva de l’auta definizion.
L Minister del Svilup Economich (Mise) l à stabilì dai 15 ai 23 de firé del 2022 na distribuzion neva tel Trentin de la frequenzes anter la emitentes televisives. Per rejons de armonisazion co la Regions e Provinzies de confin, te dotrei raions l calènder l vegnarà antizipà: ai 4 de firé tel Comun de Bondon e te la val del Chiese sul confin co la Lombardia; ai 8 de firé tel comun de Vermiglio (auta val de Sole semper sul confin co la Lombardia) e ai 14 de firé te l’auta val de Non e na pèrt de la val de Sole, dessema con dotrei raions del Sudtirol.
L nef sit per i utenc trentins
Tel Trentin, l sit de referiment l é www.trentinoinrete.it/TVdigitale, metù a jir da la sozietà de sistem Trentino Digitale. Te la sezion dedichèda a la “TV digitale” de “Trentino in rete”, se pel troèr la 10 schedes co la dates de la neva distribuzion de la frequenzes.
Vigni scheda spezifichea i Comuns touc ite, la mapa del segnal televisif, la informazions prinzipèles e vèlch consei de utol. Te la pruma piata, l sit l moscia l contator di Comuns che de firé i vegnarà touc ite tel refarming de la frequenzes.
A dreta de la piata “TV digitale”, l é a la leta di sentadins i tutorial video e i numeres da chiamèr tel cajo che serve n didament tecnich.
La neva distribuzion de la frequenzes anter la emitentes televisives la comportarà per i sentadins trentins la sintonisazion endodanef di canai, che per vigni raion geografich e per i Comuns touc ite, la cognarà esser fata la medema dì del intervent (via per l domesdì o da sera).
Per beleche duta la televijions la prozedura de sintonisazion la é automatica. Se enveze la televijion no l’à la funzion automatica, ge volarà fèr la sintonisazion a man di canai.
A livel nazionèl, l sit de referiment l é chel del minister del Svilup economich (Mise) https://nuovatvdigitale.mise.gov.it.
L’autra dates de la TV digitèla
Ai 8 de mèrz del 2022 vegnarà metù en doura sun dut l raion nazionèl l codesc nef de trasmiscion di contegnui MPEG-4, che fossa l’adozion de l’auta definizion, lascian l standard DVB-T che l é ades.
Ence te chest cajo l consei l é chel de sintonisèr endodanef i canai.
Dal 1m de jené del 2023, la televijion talièna la tolarà su a na vida definitiva l standard DVB-T2. Duc i canai nazionèi trasmetui con codec video Mpeg-2 i cognarà vegnir lascé su dant che sie fora l 2022, e chi che no à na TV o n decoder aldò no i podarà più i veder.
Per favorir l’adozion di neves standard televisives e l adatament di aparac più veies, l Mise l à pervedù doi contribuc da pèrt del Stat: l Bonus TV – Decoder e l Bonus Rotamazion TV.
Traduzion di Servijes Linguistics e Culturèi del Comun general de Fascia
(Traduzione a cura dei Servizi Linguistici e culturali del Comun general de Fascia)
